Американскиот претседател Џо Бајден изјави дека е „оптимист“ дека може да се постигне договор за прекин на огнот во Газа.
„Ние сме поблиску отколку што некогаш бевме“, рече американскиот претседател по последната рунда разговори, додавајќи дека го испраќа својот државен секретар во Израел за да продолжи со „интензивните напори за склучување на овој договор“, пренесува Би-би-си.
Поради загриженоста дека Иран може да изврши напад врз Израел за убиството на лидерот на Хамас Исмаил Ханије во Техеран, Бајден нагласи дека „никој во регионот не треба да преземе активности за да го поткопа овој процес“.
Хамас изрази скептицизам за шансите за договор. И без да ја спомене можноста за прекин на огнот, Израел рече дека „ги цени напорите на САД и посредниците да го одвратат Хамас од неговото одбивање на договор за ослободување заложници“.
Од почетокот на кампањата на израелската војска во Газа за уништување на Хамас како одговор на нападот без преседан врз јужен Израел на 7 октомври, при што беа убиени околу 1.200 луѓе, а 251 беа земени како заложници, досега во Газа се убиени повеќе од 40.000 луѓе, според Министерството за здравство на територијата што го води Хамас.
Договорот за прекин на огнот договорен во ноември му овозможи на Хамас да ослободи 105 заложници во замена за еднонеделен прекин на огнот и ослободување на околу 240 палестински затвореници во израелските затвори. Израел соопшти дека 111 заложници се уште се држат, од кои 39 се претпоставува дека се мртви.
Во неодамнешното заедничко соопштение, САД, Катар и Египет изјавија дека претставиле предлог за договор за прекин на огнот и ослободување заложници што ги „намалува јазот“ меѓу Израел и Хамас.
Израел рече дека каков било договор за прекин на огнот ќе бара ослободување на преостанатите заложници однесени во Газа од милитантите за време на нападот врз Израел на 7 октомври. Некои од 251 заложник веќе се ослободени, додека други се смета дека загинале во Газа.
Роднините на заложниците кои сè уште се во Газа ги нарекуваат тековните преговори како „последна шанса“ некои од нив да се извлечат живи. По 10 месеци војна и илјадници жртви, постои огромен притисок за пробив.
Поширок регионален конфликт, во случај разговорите меѓу Израел и Хамас целосно да пропаднат, е посебна можност и е нешто од што сите инволвирани се плашат.
Посредниците рекоа дека изминатите два дена дискусии за прекин на огнот биле „сериозни, конструктивни и водени во позитивна атмосфера“.
Се очекува техничките тимови да продолжат да работат во текот на следните денови на деталите за тоа како да се спроведат предложените услови пред високите владини претставници повторно да се сретнат во Каиро, со надеж дека ќе постигнат договор за условите утврдени во Доха.
И покрај тоа што изјавата на медијаторите е јасно позитивен развој на настаните, има уште долг пат пред да се постигне договор за прекин на огнот.
Подготви: Д. Мишев
