„Ако успееме да ги затвориме прашањата со соседите и успееме да станеме нормална држава, првин балканска, пример за сите соседи – демократска земја, и сите заедно да се избориме за обединета Македонија во рамките на обединета Европа, јас би бил најсреќен Македонец“, рече Петар Богојески, еден од реформаторите на ВМРО-ДПМНЕ, осврнувајќи се на актуелните преговори на новата Влада со властите во Бугарија, и воопшто, на надворешната политика и на билатералните односи со соседните земја, на минатонеделната трибина „Без табу теми“, што се одржа на иницијатива на ЦИВИЛ.
„Бегањето од јавни разговори…, мене ми е сомнителна потребата од тајни разговори, јас сакам јавни разговори. Инсистирам, Договорот со Бугарија, да биде ставен пред очите на јавноста, да биде ставен на јавна дебата, а прочитав некаде дека Договорот бил финализиран. Бев студент таму, и лично сум заинтересиран кои формулации се најдени како решение. Ние се обидуваме од 1999, да најдеме формулации на тие решенија и сметам дека во 2000, имавме пронајдено солидно решение… Мислам дека ако успееме да ги затвориме прашањата со соседите и успееме да станеме нормална, првин балканска држава, пример за сите соседи- демократска земја, и сите заедно да се избориме за обединета Македонија во рамките на обединета Европа, јас би бил најсреќен Македонец! Од тој аспект, делењето на предавници и патриоти, па сега, кој плука на разговорот е патриот, а тој што се интересира за Договорот е предавник, за мене, тоа е тотално вокабулар од минатото, за коешто се бориме да се стави крај“, акцентираше Богојески.
„Во врска со надворешната политика на Република Македонија и актуелните случувања, ние овие напори коишто сега се случуваат во преговорите со Република Бугарија, ги гледаме како обид да се забрза процесот на интеграција на Република Македонија во евроатланските структури. Свесни сме дека НАТО клубот, европскиот клуб, намерно ги користам тие термини, се ексклузивитет на нивните членови. Aко ние сериозно се занимаваме со политика, тогаш знаеме дека членовите во тие клубови имаат ексклузивни права, кон оние што доаѓаат во нивните клубови. Од тој аспект гледано, јас на разговорите со која било земја, не гледам како на уцена или напад врз македонската државност, туку напротив, како простор за да ја прошириме соработката со нашите соседи“, рече Богојески.
„Ако Србија е расположена да разговараме и конечно се затвори непотребното прашање со Црквата, тогаш да разговараме веднаш. Ако разговорите со Бугарија ни го отвораат патот за НАТО, тогаш да ги затвориме веднаш. Ако разговорите со Грција, ни го отвораат патот за ЕУ, тогаш треба веднаш да разговараме и да ги затвориме прашањата. Ако разговорите со Албанија помогнат за да добиеме дополнителна кохезивна енергија во македонското општество, тогаш треба да разговараме веднаш“, порача Богојески на трибината.
Моника Талеска
Камера: Дехран Муратов