ВЕСТ НА ДЕНОТ
Пендаровски го одби барањето за помилување на Катица Јанева, негативно мислење дала и Комисијата за помилување
Претседателот на државата го одбил барањето за помилување на поранешната шефица на Специјалното јавно обвинителство Катица Јанева. Од Кабинетот на претседателот на државата посочуваат дека негативно мислење дала и Комисијата за помилување.
– Претседателот го одби барањето за помилување на поранешната специјална обвинителка Катица Јанева. Исто така и Комисијата за помилување, која е советодавно работно тело во Кабинетот на претседателот, даде негативно мислење по барањето, наведуваат од Кабинетот на претседателот.
ИЗЈАВА НА ДЕНОТ
Постојат информации дека во некои од основните и средните училишта некои деца, поединци, одат на настава, на часови со ножеви кои секако можат да предизвикаат опасности. Токму затоа е потребно сите заеднички да продолжиме да ги поттикнуваме младите да бидат повеќе посветени и повеќе внимателни во однос на употребата на било какви…, па дури и физичка сила или погрдни зборови. И булингот не треба да го заборавиме, тој е се повеќе присутен и навистина може да претставува голем проблем, изјави деканот на Факултетот за безбедност Никола Дујовски.за Цивил
ФЛЕШ ВЕСТИ
АНТИКОРУПЦИЈА Поднесена кривична пријава против двајца полициски службеници од ГП Ќафасан за „примање поткуп“ и „несовесно работење во службата“
ВЛАДА Вашингтон директно и порача на опозицијата да го поддржи европскиот пат на државата, да поддржи уставни измени и да не блокира закони од клучно значење за државата, брифираат владини извори, сумирајќи ја посетата на владината делегација на САД.
ИНТЕГРАЦИИ Како што најави на брифинг за медиумите, министерот за транспорт и врски Благоја Бочварски утре во Црна Гора ќе го потпише анексот на Договорот со ЕУ со којшто Коридорот 8 влегува во мрежата на главни коридори во регионот и во ЕУ, а тоа е и еден од аргументите на Владата за користењето европско знаменце за законските измени за проектот со „Бехтел и Енка“.
ЕКОНОМИЈА Европската комисија предвидува дека македонската економија годинава ќе забележи раст од два отсто, а во 2024 од 3,1 процент.
ВОЈНА ПРОТИВ УКРАИНА
Состојба Бахмут: Путин се соочува со „најлошото можно сценарио“, напредувањето на украинските сили е почеток на претстојната офанзива.
Напредувањето на украинските трупи во насока Бахмут е првиот успех на офанзивните операции во одбраната на градот; сепак, ова е само „делумен успех“, изјави командантот на украинските копнени сили, генерал-полковник Олександр Сирскиј. Според него, последните неколку дена покажале дека вооружените сили на Украина можат да се движат напред и да го елиминираат непријателот дури и во исклучително тешки услови.
АЛ-ПРЕС
Во Албанија вчера се одржаа локалните избори на кои учествуваа околу 37 отсто од граѓаните. Според последните информации, Социјалистичката партија на Еди Рама води пред коалицијата „Заедно победуваме“. Во Брисел денеска продолжува дијалогот помеѓу Косово и Србија за формирањето на Заедницата, со средби на кои фокусот ќе биде ќе биде имплементацијата на Договорот за патот кон нормализација на односите и неговиот Анекс.
Во продолжение се темите од редакцискиот избор на ЦИВИЛ Медиа, од албанските медиуми во регионот.
МУЛТИКУЛТУРА
Големата конференција на ЦИВИЛ „Односи меѓу заедниците: Перцепции, надежи и стравови, предизвици и решенија“ ќе се одржи утре во 12 часот
Конференцијата „Односи меѓу заедниците: Перцепции, надежи и стравови, предизвици и решенија“ во организација на ЦИВИЛ-Центар за Слобода, ќе се одржи утре, 16 мај (вторник), во хотел Парк Резиденс, со почеток во 12 часот.
На Конференцијата ќе се опфатат општествено-политичките аспекти на односите меѓу заедниците, мултикултурализмот и европските вредности. Настанот се одржува и во контекст на Светскиот ден на различностите, 21 мај.
АНАЛИЗА
Плимата на војната во Украина се сврте против руските платеници од „злосторничкото здружение“ Вагнер во најжестоката битка од војната во Бахмут, а на нивниот воз, управуван од „машиновозачот“ Пригожин, кој е во константен недостиг од погонско гориво, му се заканува излетување од шините.
Тој отворено застана против највисоките руски воени лидери, „беснееше“ во видео кое, во стилот „ти кажувам ќерко, сети се снао“ беше прикриено упатено кон рускиот претседател. Пригожин упати шокантни закани дека ќе ги повлече своите трупи и ќе објави детали за неуспесите на руската војска доколку неговите сили не ја добијат потребната муниција, а сега протекоа документи дека Пригожин преговарал со Кијив да ги предаде руските позиции во Бахмут.
Некои Руси завршија мртви или во затвор за многу помалку, пишува Драган Мишев во анализата „Пригожин го кине синџирот на Путин“
Д. Мишев
