Заедничка изјава на комесарот Јоханес Хан и членовите на Европскиот парламент Едуард Кукан, Кнут Флекенштајн и Иво Вајгл:
„Ние се сретнавме денеска со претставниците на парламентарните партии. Многу јасно нагласивме дека сите лидери на земјата, вклучувајќи го и претседателот, сега мора да ги почитуваат резултатите од неодамнешните избори. Во една демократија, секој мора да ги признае парламентарните мнозинства.
Затоа, ние го охрабруваме претседателот итно да ја преиспита својата позиција. Нема време за губење. Сега очекуваме, сите политички лидери и институции да овозможат демократскиот процес да продолжи со својот тек – во интерес на граѓаните на земјата. Одложувањата во изминатите месеци веќе носат штети по економијата на земјата.
Затоа, повикуваме на брзо формирање на новата влада, посветена на спроведување на заостанатите реформи. Очекуваме од партиите и од новата влада да продолжи со спроведувањето на сите делови од нивниот договор од Пржино.
Особено, ги повикуваме сите да се воздржат од какви било активности и изјави кои би можеле да разгорат меѓуетничките тензии или да ги поткопаат добрососедските односи. Никој не смее да паѓа во искушение да си игра со оган. Длабоко сме загрижени од тензиите и говорот на омраза. Слободата на собирање и слободата на изразување се основни права во демократските општества, но тие доаѓаат и со одговорности.
Во иста насока, негативната реторика насочена кон меѓународната заедница и граѓанските организации е сосема контрапродуктивна. Тоа ја поткопува позицијата на земјата на меѓународен план, како и кредибилитетот на оние кои го користат.
Заклучок, потребно ни е, веќе во неколкуте наредни денови, да видиме сериозно и одговорно државништво од релевантните институции, за да се овозможи брзо формирање на нова и цврста коалиција. Тоа е единствениот начин на враќање на патот кон ЕУ – нешто што вашите граѓани го сакаат и го заслужуваат“.
