Не секој ден, туку секоја минута што му беше дадена на овој манијакален зависник од пари и моќ, садист со ниски, гангстерски пориви – беше и е ненадоместлива штета за животот на секој од нас. Многумина од нас не изгубија по една деценија од животот, туку многу повеќе. Ја изгубивме Македонија каква што можеше да биде. Без оглед на сите билмези и арамии пред него, имавме повеќе и подобри шанси. Со овој насилник и неговите послушници потонавме во мизерија од која можеме да се извлечеме само со многу работа, чесност и спроведување на правдата. И пак нема да стасаме таму каде што можевме да бидеме пред него.
Во неславниот разговор со Чомовски на Телма, Груевски уште еднаш покажа дека е подмолен и бескрупулозен, без оглед на тоа што (не)намерно му беше даден простор за лаги и манипулации. Покажа дека е решен да оди до крај. Не смееме да го занемариме неговиот капацитет да сее терор и да повлекува лудачки и насилнички потези во последните денови, пред неговата криминална структура да биде потполно згмечена.
Важно е дека процесот е деблокиран, но уште поважно е тој да се одбрани, за да продолжи. Тука сме повикани сите ние, секој од нас. И ти што го читаш ова! Да. Убеден сум во тоа.
Мораме да внимаваме и на оние што ветија дека ќе бидат носители на таа промена. Премногу грешки направија и до сега, за да им веруваме безрезервно. Лидерите на новото мнозинство допрва треба да одговорат на други, помалку пријатни прашања. Почнувајќи од прашањата за транспарентност, завршувајќи со тајмингот на етничките теми. Прашањата за процедурите се губење време и релативизирање на злото. „Процедуралните грешки“ во изборот на Талат Џафери се трикови на Груевски и мафијата. Пред наездата на теледиригираните криминалци и фашисти, изборот на Џафери беше повеќе од легитимен, а потегот храбар и одважен. И малку задоцнет.
Долга е листата на злосторниците и нивните соучесници. Судиите кои го опструираат СЈО, обвинителите на ОЈО, уставните судии… мора да одговараат! Време е за затвор. Таму друштво ќе мора да им прават “уметниците” и “новинарите” – малите, злобни гебелси на Груевски. Ако тие што имаат амбиција да ја водат оваа земја во иднина, сакаат да добијат почит и доверба, мораат да ги доведат престапниците пред лицето на правдата. Час поскоро! Без компромиси! Нема време за “стратешко” чекање!
Објавено и во Плусинфо. Текстот е личен став на авторот.
