Наглото укинување на строгите ограничувања за коронавирусот во Кина може да резултира со експлозија на новозаразени и повеќе од еден милион смртни случаи во 2023 година, според новите предвидувања на американскиот Институт за мерење и евалуација на здравјето (IHME).
Според предвидувањата на Институтот, бројот на случаи во Кина ќе го достигне врвот околу 1 април, кога бројот на починати би можел да достигне 322.000. Околу една третина од кинеското население ќе биде заразено дотогаш, изјави директорот на IHME, Кристофер Мареј.
Кинеската национална здравствена администрација не пријавила официјални смртни случаи откако се укинаа ограничувањата за Ковид-19. Последните официјални смртни случаи беа пријавени на 3 декември. Вкупниот број на починати во пандемијата е 5.235.
Кина во декември ги укина некои од најстрогите ограничувања во светот по јавните протести без преседан и сега се соочува со драстично зголемување на инфекциите, стравувајќи дека коронавирусот би можел да ја зафати нејзината популација од 1,4 милијарди луѓе следниот месец за време на празниците во лунарната Нова година.
Кинеската политика за нулта борба против короната можеби беше ефикасна во сузбивањето на претходните варијанти на вирусот, но високата преносливост на сојот омикрон го направи тоа невозможно, истакна Мареј.
Независна група за моделирање на Универзитетот Вашингтон во Сиетл, на која се потпираат владите и компаниите за време на пандемијата, црпеше податоци од покраината и информации од неодамнешната појава на омикрон во Хонг Конг.
Од првичното избувнување на епидемијата во Вухан, Кина едвај пријави смртни случаи. Затоа, го погледнавме Хонг Конг за да добиеме идеја за стапката на смртност од инфекцијата, нагласи Мареј.
За своите прогнози, IHME користи и информации за стапките на вакцинација, обезбедени од кинеската Влада, како и претпоставки за тоа како различните провинции ќе одговорат на зголемените стапки на зараза.
Други експерти очекуваат дека околу 60 отсто од кинеското население на крајот ќе биде заразено, што најтешко ќе ги погоди ранливите популации, како што се повозрасните и оние со претходно постоечки болести.
Јанџонг Хуанг, виш соработник за глобално здравје при Советот за надворешни односи, изјави дека во Кина има 164 милиони луѓе со дијабетес, што е фактор на ризик за лоши резултати од коронавирусот. Има и осум милиони луѓе на возраст од 80 и повеќе години кои никогаш не биле вакцинирани.
Кинеската национална здравствена комисија соопшти дека ја зајакнува вакцинацијата и складира респиратори и најнеопходни лекови.
