КОХА: Во Украина е покрената петиција за признавање на Косово
Украинскиот пратеник, истовремено и член на Парламентарното собрание на Советот на Европа, Олексеј Гончаренко, во средата објави дека покренал петиција Украина да ја признае независноста на Косово, пренесе КОХА.
Во петицијата се бара од украинскиот претседател Володимир Зеленски да ја разгледа можноста за признавање на Косово. Се споменува дека Косово е признаено од моќни западни земји, вклучително и Соединетите Американски Држави, и дека Меѓународниот суд на правдата одлучил дека прогласувањето на независноста на Косово не го прекршува меѓународното право.
„Русија не го признава Косово и тие земји ги смета за српски. Во исто време, пропагандистите на Кремљ велат дека е неопходно на Балканот да се преземе истата наредба како Путин на 24 февруари“, се наведува меѓу другото во петицијата.
РЕПОРТЕРИ.НЕТ: Членствo во ЕУ, чекори кои Косово мора да ги преземе
Претседателката на Република Косово Вјоса Османи, премиерот Албин Курти и Глаук Коњуфца денеска ја потпишаа апликацијата за членство на Косово во Европската унија, објави косовскиот портал РЕПОРТЕРИ НЕТ.
По аплицирањето за членство, постојат три главни чекори. Кандидатурата или кандидатскиот статус значи формално прифаќање на апликацијата на една земја. Тоа подразбира и едногласна одлука на Европскиот совет за официјално прифаќање на апликацијата на земјата. А потоа Советот и земјата кандидат мора да се договорат за рамка за преговори за членство.
Земјите-кандидатки добиваат и финансиска и техничка помош во текот на процесот на пристапување. Буџетот на ЕУ за претпристапна помош за 2021-2027 година е 14,162 милијарди евра.
Преговорите за членство започнуваат откако земјата кандидат ќе ги прилагоди своите национални закони за да се усогласи со правилата на ЕУ, наречени acquis. И ова може да потрае неколку години.
Земјата отсега се смета за „пристапна земја“ до официјалниот датум на пристапување, кога ќе стане полноправна членка на ЕУ, се вели во новинскиот извештај.
ОПИНИОН: Реакција на Вучиќ по апликацијата на Косово за членство во ЕУ
Српскиот претседател Александар Вучиќ реагираше на првиот чекор на Косово за приклучување кон европското семејство, пренесе ОПИНИОН.
„Договорот од Куманово, Повелбата на ОН, Резолуцијата 1244, Бриселскиот договор или Вашингтонскиот договор. Дојдовме до шестиот многу важен документ на ЕУ од 2003 година, познатиот Солунски документ, за проширување на ЕУ во Западен Балкан. А во светлината на поднесувањето на Косово за членство во ЕУ, моето прашање е дали ќе ги почитуваат документите што сами ги донесоа, па дури и историскиот од Солун, бидејќи во точка 5 од Солунскиот документ се вели дека целосно ја поддржува имплементацијата на Резолуцијата. 1244. Значи, моето прашање денес е кој од овие шест документи сакате да го почитувате и ние апсолутно ќе се согласиме“, порачува Вучиќ.
Инаку, Вучиќ веројатно мисли на Солунската декларација која беше донесена на Самитот ЕУ – Западен Балкан, на 21 јуни 2003 година.
„Сите ние ги споделуваме вредностите на демократијата, владеењето на правото, почитувањето на човековите и малцинските права, солидарноста и пазарната економија, целосно свесни дека тие ги сочинуваат самите темели на Европската унија. Почитувањето на меѓународното право, неповредливоста на меѓународните граници, мирното решавање на конфликтите и регионалната соработка се принципи од највисоко значење, на кои сите сме посветени. Ние енергично го осудуваме екстремизмот, тероризмот и насилството, било да е тоа етнички, политички или криминално мотивирано“, гласи првиот член од Декларацијата.
Д. Тахири
