коментира: ЏАБИР ДЕРАЛА
По двобојот на Канал 5, се слушна повикот и за повторување на мечот на Алфа ТВ. Зоран Заев, слушајќи го гласот на своите поддржувачи, ја одби оваа „љубезна“ покана пред камерите и предизвика кратка, но бурна и жолчна, а секако и вулгарна, дебата на бојното поле познато и како Сурат тефтер. Едните велат дека ТВ Алфа не е медиум, туку криминално и пропагандистичко гнездо, а другите велат дека Заев, сепак, требало да ја прифати поканата.
Без да навлегуваме во аргументацијата и на едната и на другата страна, можеби е време, пред да биде предоцна, да поставиме едно принципиелно прашање. За што, всушност, ни служи МРТВ, јавниот медиумски сервис?
Македонската радио телевизија им припаѓа на сите граѓанки и граѓани, таа ги има и општествената функција и ресурсите, повеќе од доволно, да биде простор за политички дуели и дебати во изборниот процес. Директор на јавниот сервис е од редовите на опозицијата, програмата се емитува на повеќе јазици што се говорат во земјата и (би требало да) претставува единствен неутрален терен на кој ќе се соочат политичарите што претендираат да ја водат земјата на било кое ниво.
Нема причина политичките лидери да одат во една или во друга приватна телевизија. Адресата за вакви медиумски настани треба да биде јавниот сервис и толку. Еве, нека биде тоа и со право на пренос и на другите телевизии, бесплатен или со платно.
Или, зошто да не, може да се организира дуел во некоја сала, може и со публика, па секоја редакција што има камера, да добие место во гледалиштето и да ги снима овие политички спектакли. Може и карта да се наплаќа, а средствата да бидат наменети за купување некој апарат во болница или да се поправи некој покрив на училиште, кога веќе ДУИ влезе во „славната акција“ да ги менува нивните имиња и натписи. Така, политичките ривали, колку и да се лути противници, ќе бидат во ситуација да направат нешто заедно.
БЛИЦ е рубрика на ЦИВИЛ МЕДИА во која објавуваме кратки, најчесто редакциски, коментари поврзани со веста на денот во рубриките ДНЕВНИК и ПОЛИТИЧКИ ОКЕЈ КОРАЛ, но и за други актуелни настани во земјата и во светот.
Сите права се задржани. Услови за користење, авторски права и заштита на приватноста.
