По низата масовни усмртувања на бездомни и домашни миленици низ целата територија на Република Македонија, здруженијата за заштита на животните најавуваат мирен протест што ќе се одржи во недела на 9 април, со почеток во 12.30 часот на плоштадот „Македонија“.
Освен расфрлање на смртоносен отров „метомиол“ и „ланате“, скопјани се соочија и со пострашни глетки: бесење на кучиња- маалски миленици со ловџиски јамки во Ново Лисиче и отстрел со огнено оружје на мајка со младенче во Нерези. Предизвикувањето општа опасност е казниво според Кривичниот законик, мачењето и убивањето животни е спротивно на Законот за заштита и благосостојба на животните, а поставувањето стапици во урбана средина е спротивно на Законот за ловство. Полицијата е должна по службена должност да преземе мерки за наоѓање на сторителот и да пријави во Инспекторат за ловство.
Во разговор со Анета Д. активистка на „Анима Мунди“ која ги пронајде и пријави во полиција обесените маалски миленици во близина на ФФМ во Ново Лисиче на 18 март, дојдовме до сознание дека полицијата првенствено не сакала да излезе на терен, дека по нивната интервенција е направен само записник, а јамките не се отстранети.
„Се јавивме во полиција, првично не сакаа да дојдат бидејќи не ни бил познат сторителот и затоа што биле бездомни кучиња, а откако им кажав дека стапиците претставуваат опасност и за луѓе, сепак дојдоа. Направија увид и си заминаа. Потоа, ги отстранивме стапиците за да не претставуваат опасност и понатаму. Овие денови се забележани нови стапици, овојпат со дупли сајли”, изјави активистката Анета за ЦИВИЛ Медиа.
„Труења има во континуитет и насекаде, полицијата секогаш добива голем број пријави и укажувања за редовно фрлање отрови на одредена локација. За жал, најчесто не излегуваат на терен, или постапуваат само проформа, бирократски… Најчесто процесот запира на правење записник и кревање раменици од нивна страна. Активностите кои ги преземаат се површни, неадекватни, недоволни, колку да се рече дека нешто е преземено. Во целост го маргинализираат кривичниот деликт, иако законот за вакви дела предвидува и казна затвор. Институциите се во континуитет неажурни и инертни за појавата на расфрлање отрови, иако таквото дело е опасност по здравјето и безбедноста на сите, а насилството врз животните е речиси секогаш, само еден чекор пред насилство врз луѓето. Посочуваме дека да расфрлаат отрови и мачат и убиваат животни, можат само деликвенти, социопати, насилници… Затоа, повеќе од било кога, евидентна е потребата од наменска, специјализирана служба во Република Македонија, ‘Полиција за животни’, служба која ќе биде сочинета од активисти и лица кои вистински ќе се посветат на превенција/евиденција/санкција на овие недела”, изјави за ЦИВИЛ Медиа, Наташа Кнежевиќ, активистка на „Анима Мунди“.
„Ги повикуваме институциите – Министерство за внатрешни работи, Агенција за храна и ветеринарство, единиците на локална самоуправа, итно да постапат, да изнајдат хумани и ефикасни начини за надминување на проблемот со бездомни животни; да се укине слободната продажба на отрови кои се опасност за сите; да се најде решение за формирање на Полиција за животни, затоа што е повеќе од очигледен фактот дека насилството врз животните е декаден срам и обележје на Република Македонија“, се вели во соопштението на „Анима Мунди“.
Освен во парковите, отров е забележан и во близина на неколку училишта и градинки низ цела територија на Македонија, односно на фреквентни места каде што континуирано циркулираат поголем број на луѓе и деца. Еден таков случај е забележан во Охрид во близина на детската градинка “Јасна Ристеска” каде што за два дена се затруени поголем број на бездомни кучиња.
Ивана Талеска
