„Граѓаните да го искористат своето демократско право и да гласаат на референдумот кој е историски за натамошниот напредок на Македонија на патот на интегрирањето на земјата во НАТО и ЕУ, и во тоа ја имате поддршката од САД“, изјави американскиот секретар за одбрана, Џејмс Матис, на заедничката прес-конференција со премиерот Зоран Заев и министерката за одбрана Радмила Шекеринска.
Матис потсети на годишнината од референдумот на кој од 95 отсто од граѓан(к)ите и граѓаните се одлучива за независност на земјата, и дека за две недели ќе добијат уште една можност за да ја придвижат земјата напред.
„Ви аплаудирам за вашите неуморни напори да го постигнете историскиот договор од Преспа со Грција. Знаеме дека тоа бараше трпелива дипломатија од двете страни и компромисите се секогаш тешки“, рече Матис.
Тој потсети и на изјава на генералниот секретар на НАТО, Јенс Столтенберг, дека со приклучувањето во НАТО, Македонија ќе добие еднакво место во најуспешната воена алијанса заедно со 29 други земји членки кои се обврзуваат да ги штитат граѓан(к)ите и граѓаните.
„Ние сме подготвени да ви поскаме добредојде како 30. членка на НАТО“, порача секретарот за одбрана на САД.
По завршувањето на заедничката прес-конференција, американскиот секретар се сретна и со претседателот, Ѓорге Иванов, со кој рече дека ќе ги продолжи разговорите за светлата иднина на земјава.
Претседателот Иванов на средбата истакна дека пристапувањето во НАТО и ЕУ останува стратегиска цел и највисок приоритет на Македонија, што ќе придонесе за напредок и просперитет на целиот регион.
Иванов се заблагодари за поддршката што Македонија ја добива од САД, со цел унапредување на реформите во одбраната и безбедноста.
„Иако не сме во НАТО, нашата армија е НАТО-компатибилна и за тоа сме им благодарни на САД. Тоа е влог во иднината. Мораме да бидеме подготвени за новите закани и за новите предизвици“, порача претседателот.
Американскиот секретар за одбрана, Џејмс Матис, пристигна претпладнево во Владата, каде што оствари средба со премиерот Зоран Заев и вицепремиерката и министерка за одбрана, Радмила Шекеринска.
Тој на Меѓународниот аеродром Скопје беше пречекан од министерката Шекеринска и американскиот амбасадор Џес Бејли.
А. Петровска
фотографија: Киро Попов/kolektif.mk