Еврокомесарот за проширување и добрососедски односи Јоханес Хан, денеска е во Скопје. Агендата на Хан предвидува средби со лидерите на парламентарните политички партии.
Неговата работа посета започнува во 14 часот, за кога е закажана првата средба со претседателот на Беса, Билал Касами. Потоа, еврокомесарот ќе се сретне со лидерот на Алијансата на Албанците, Зијадин Села. По едночасовните средби со Касами и Села, според агендата во 16.30 часот, Хан ќе се сретне со Али Ахмети, од ДУИ.
Средбата со лидерот на СДСМ, Зоран Заев е закажана за 17.45 часот. Последен на официјалната агенда на Хан, е претседателот на ВМРО-ДПМНЕ, Никола Груевски.
Дали Јоханес Хан ќе се сретне со претседателот Ѓорге Иванов, сé уште е неизвесно. Иванов вчера беше во работна посета на Унгарија, и не се знае кога се враќа во земјава. Сепак, не е исклучена можноста за средба Хан-Иванов, доцна вечерва по последната средба со Груевски, која е предвидено да заврши во 21.15 часот.
На денешните средби се очекува Хан да го потврди својот став во однос на формирањето на нова влада. Toa го најави портпаролката на Европската комисија, Маја Коцијанчич во петокот. Таа изјави дека Хан во Скопје ќе ја повтори цврстата порака на ЕУ да се почитуваат изборните резултати и да се овозможи демократските процеси да продолжат и брзо да се формира влада што ќе продолжи да го имплементира Договорот од Пржино.
„Прифаќање и почитување на изборните резултати и правото на лидерите да се обидат да формираат влада е знак на зрела демократија. За попречување и за поткопување на таквите напори, нема место во демократскиот процес. Оттука, очекуваме сите страни да ги почитуваат демократските принципи и стандарди, да се вклучат конструктивно за да се најде основа за заедничка работа и за соработка, наместо да се трага по можности за поткопување на едни со други. Таквите пристапи во минатото ја однесоа земјата во криза. Тие мора да се избегнуваат од сите страни, без разлика дали се во владата или се опозиција. И владата и опозицијата имаат улога и значење во функционирањето на демократија и ја формираат иднината на земјата“, изјави Хан, откако Иванов одлучи да не го додели мандатот.
Еврокомесарот за проширување во Македонија доаѓа заедно со тројцата европратеници Иво Вајгл, Едвард Кукан и Кнут Флекенштајн.