Историските предвремени избори завршија. И прегласувањето во Теарце заврши со победа на СДСМ пред ВМРО-ДПМНЕ. Но, постизборна Македонија, влезе во уште поголема политичка криза. Со актуелниот распоред на освоените пратенички мандати од ВМРО-ДПМНЕ-51, СДСМ-49, ДУИ-10, Беса-5, Алијанса за Албанците-3 и ДПА-2, невозможно е да се формира стабилна влада.
Единствена задача на партиите и на нивните лидери е да се најде идеална солуција. Како што велат експертите, солуција за формирање на евентуално нова, реформска, експертска или широка влада којашто ќе ја води државата до конечна консолидација на државните институции и до нови парламентарни избори. На кои ќе се избере стабилна влада на стабилна држава, проевропски ориентирана, ослободена од криминалците во политичките редови, со судство кое се базира на закон, а не на волјата на партиските лидери, со завршени кривични предмети на Специјалното јавно обвинителство (СЈО) и со реформи во радиодифузијата што ќе ја вратат на сцена објективната, вистинита и балансирана информација со професионални новинари, а не со партиски пулени.
Македонија ја започна Новата 2017 година, нереформирана, во уште посложена политичка констелација, исправена пред низа предизвици.
Конституирано деветтото Собрание
Државната изборна комисија (ДИК) им ги врачи уверенијата за мандатите на 120-те нови пратеници во македонското Собрание. Во овој собраниски состав има 62 нови и 58 пратеници од претходниот состав.
Официјално е конституиран деветтиот по ред собраниски состав на Македонија. Тројцата лидери од пржинската четворка: Никола Груевски, Зоран Заев и Али Ахмети присуствуваа, а лидерот на ДПА, Мендух Тачи не се појави овој пат. На конститутивната седница присуствуваа претставници од дипломатскиот кор, од верските заедници, премиерот Емил Димитриев, но иако беше поканет не се појави претседателот Ѓорге Иванов.
Откако ќе се постигне договор за нова владина коалиција, ќе биде разгледуван и предлогот за избор на нов собраниски спикер.
Пржинската влада е веќе минато
Министрите и дополнителните заменици министри во МВР и МТСП,кои што беа назначени согласно со Договорот од Пржино, се разрешени. На нивно место се именувани кадри, онако како што се договорија лидерите на четирите релевантни партии од македонскиот и албанскиот блок, кои со поддршка на меѓународната заедница го скроија Пржинскиот договор.
Така наместо досегашниот министер за внатрешни работи, Оливер Спасовски, обврските ги превзеде, Агим Нухиу од ДУИ. На местото на министерката за труд и социјална политика од СДСМ, Фросина Ташевска- Ременски, сега е назначен Ибрахим Ибрахими, исто така од ДУИ. Без функција остануваат и дополнителните заменици министри од ВМРО-ДПМНЕ, Оливер Андонов и Диме Спасов, како и Кире Наумов од СДСМ.
Овој владин состав стартуваше во ноември 2015 година, а при секое одлагање на изборите, беа враќани старите министри. Но, откако пред една година поднесе оставка, Никола Груевски не се врати на функција, а на негово место беше именуван Емил Димитриев.
Комбинаторики за новата влада, „асовите“ се кај ДУИ
Лидерите на партиите на етничките Албанци во Македонија, во рок од 10 дена, два пати во Тирана, на покана на албанскиот премиер Еди Рама, ги усогласуваа ставовите и договараа заедничка платформа, за што подобри позиции при конституирањето на новата македонска влада.
Во ек на политичките постизборни калкулации и преговори, лидерите сé уште тактизираат. Но, лидерот на ДУИ, Али Ахмети експлицитно изјави дека доколку не биде прифатена неговата платформа, не е исклучена можноста да нема Влада. Според него, барањата на Албанците се разумни и треба да се затворат.
Лидерите и на двете партии од македонскиот блок, ВМРО ДПМНЕ и СДСМ, Никола Груевски и Зоран Заев на граѓаните им ветија дека ќе формираат влада. И Груевски и Заев сериозно сметаат на ДУИ како партнер во новата Влада.
Новата владина коалиција ќе биде клучна и за работата на Специјалното јавно обвинителство, коешто во својата досегашна интензивна работа отвори 9 кривични случаи: „Таргет“, „Титаник“, „Тортура“, „ТНТ“, „Транспортер“, „Тврдина“, „Трезор“, „Топлик“ и „Тендери“.
Меѓународната заедница ќе ѝ честита на новата влада
Meѓународната заедница будно ги следи состојбите во Македонија. Но, своите постизборни честитки ќе ги упати, како што рече Маја Коцијанчич, портпаролката на Европската комисија, дури откако биде формирана нова влада и избран новиот премиер. Според меѓународната заедница, за новата влада, императивна треба да биде работата на СЈО до конечно судска разрешница на сите кривични дела кои ќе произлезат од аферата „Прислушување“. Ова е еден од предусловите за враќање на Македонија кон демократскиот и евроатланскиот пат.
Моника Талеска
