Утре ќе продолжи седницата на чиј дневен ред е разрешувањето на Основниот јавен обвинител Марко Зврлевски, која вчера по 18 часот, ја прекина претседателот на Собранието, Талат Џафери.
Дебата меѓу пратениците се одвиваше околу тоа дали Собранието работи законски, ако и покрај тоа што се распишани локалните избори, се разрешуваат и назначуваат лица на јавни функции.
Додека ВМРО-ДПМНЕ тврдеше дека тоа е незаконски, СДСМ контрираше дека таа обврска не важи за Собранието, туку само за извршната власт.
Адвокатот Александар Новакоски, правен експерт на ЦИВИЛ – Центар за слобода, вели дека постапката е во согласност со деловникот на Собранието, а има и мислење од Советот на обвинители.
„Продолжувањето на дебатата нема никакво влијание врз изборите, бидејќи Собранието е единствено надлежно да одлучи дали ќе ја заврши дебатата или не. Никакво мислење на Антикорупциска не може да има влијание врз одлуката. Собраниското тело надлежно за оваа точка дебатирало и постапката може да се одвива, согласно со одлуката на Собранието. Завршувањето на дебатата и гласање по изборите од прв круг е исто така, проблематично, бидејќи изборите не се конечно завршени. Собранието треба да ја заврши точката и да гласа, а не да прави компромиси кои предизвикуваат низа нелогичности“, вели Новаковски.
Пратениците на ВМРО-ДПМНЕ и Коалицијата „За подобра Македонија“, денеска до Државната комисија за спречување на корупција поднесоа барање за мислење по однос на примената на член 8-а, став 1, алинеја 4 од Изборниот законик.
„Собраниската седница на која се расправа за разрешувањето на Јавниот обвинител започната на 5 јули, сѐ уште е во тек, а тоа е во спротивност со член член 8-а, став 1, алинеја 4 од Изборниот законик, според кој, од денот на донесувањето на одлуката за распишување на избори за градоначалник, или членови на Советот, односно до конституирање на советот на општините и Градот Скопје, не може да се започне со постапка за вработување на нови лица или постапки за престанок на работен однос во државни и јавни институции, а воедно, започнатите постапки се ставаат во мирување, освен во случај на итни и неодложни работи“, се наведува во соопштението од пратеничката група на ВМРО-ДПМНЕ.
Оттаму, како што велат, очекуваат Државната комисија за спречување на корупција во најбрзо време да се произнесе за нивното барање.
М. Ивановска
