По повод Денот на планетата Земја (22 април), граѓанската иницијатива „О2 Коалиција за чист воздух“, утре ги повикува граѓаните на спонтан собир во борбата против загадениот воздух. Почетокот на собирот е најавен за 12 часот, пред „Школка“ во Градскиот парк во Скопје.
„Загадениот воздух нè засега сите. Затоа, ‘О2 Коалиција’ ве охрабрува да се приклучите кон иницијативата и заеднички да се избориме да го добиеме тоа што ни е загарантирано со Уставот, а тоа е – здрава и чиста животна средина. Земете ги со вас и дечињата и милениците, зашто сите ние подеднакво сакаме да бидеме здрави и среќни“, стои во повикот.
Иницијаторите најавуваат дека на собирот ќе се зборува за граѓанскиот активизам, за последиците од загадениот воздух, предвидено е детско катче за најмладите, а ќе биде спроведена и заедничка акција за чистење на Паркот.
„Во Македонија веќе одамна не се посветува речиси никакво внимание на животната средина. Според последните податоци, најголем еколошки стресор/хазард во Скопје е аерозагадувањето. Тоа, иако има јасни сезонски варијации, дополнително се влошува во услови на климатски промени. При процена на оптовареноста со заболувања, предизвикани од високи концентрации на PM2,5, според пресметките на Институтот за јавно здравје, во услови на просечни годишни концентрации од 48,4 μg/m3 PM2,5 во 2012 година се изгубени 4.174 години живот кај граѓаните на Скопје (82/10.000 жители), како резултат на смртност од рак на белите дробови“, додаваат иницијаторите, цитирајќи ја „Стратегијата за климатски промени на Градот Скопје“.
Како што информираат организаторите, собирот е поддржан и од Здружението за заштита на животни и животна средина „Е.Д.Е.Н.“ и Првата детска амбасада „Меѓаши“.
