„Експресниот пат низ срцето на Галичица е најкриминалната идеја што од осамостојувањето на Македонија му се заканила на Националниот парк! Тој ‘проект’ е целосно неоправдан економски, зашто ќе го наруши природното движење на туристите кои сега се качуваат на планината, со што ќе создаде вештачка бариера и ќе ги одврати планинарите и туристите…“, вели Драгана Велковска од „Охрид СОС“ во разговор за ЦИВИЛ Медиа, и потенцира дека „идејата за марината, презентирана од ВМРО-ДПМНЕ е погубна за езеро, со вредности какви што има Охридското…!“„Проектот“ не само што ужасно ќе го отежни животот на мештаните (бидејќи по патот не смее да се движат пешаци и велосипедисти и нема предвидено поврзувања со локалните населени места), не само што ќе претставува уништување на природните вредности во паркот, кои го прават ова парче земја дел од Прекуграничниот биосферен резерват, туку, тој експресен пат ќе отвори Пандорина кутија за опстанокот на Националниот парк во генерална смисла, како и за извонредните вредности на регионот и силно ќе го загрози УНЕСКО-статусот, а можеби ќе доведе и до негово одземање“, вели Велковска, како реакција на последната прес-конференција на ОК на ВМРО-ДПМНЕ од Охрид.
„Со изградбата на патот Охрид-Пештани ќе се придонесе за развојот на туризмот во охридскиот регион, но исто така, овој експресен пат е неопходен, бидејќи со неговата изградба, ќе им се олесни движењето на граѓаните кои живеат во пределот на Галичица, како во летниот, така и во зимскиот период“, изјави Љубен Арнаудов од ВМРО-ДПМНЕ, кој го најави новиот експресен пат Охрид-Пештани што ќе се гради паралелно со стариот пат во должина од 14,5 километри.
Од ОК на ВМРО-ДПМНЕ, најавија и изградба на марина во Охрид, „проект кој ќе се реализира од 2018-2020 година и ќе чини два милиона евра, а целта е да се задоволат потребите на сопствениците на пловни објекти во Охридското Езеро“.
За ова, Велковска од „Охрид СОС“ вели: „Идејата за изградба на ваков огромен капацитет од 400-500 везови, е преголем објект што ќе има негативни пoследици врз растителниот и животинскиот свет во непосредна близина, а ефектите ќе се одразат и во целина на Езерото. Закотвување на едно место на 400–500 пловни објекти од кои 95% се главно на погон со стари, вонбродски мотори на нафтени деривати (бензин, дизел или мешавина), наголемо се користат, наместо да се забрануваат, за употреба во Охридско Езеро, како во многу природни езера кои имаат и помала вредост од Охридското Езеро. Научните истражувања докажале дека еден литар нафта, трајно загадува илјадници литри вода, а колку литри нафта ќе се испуштаат во овие илјадници метри квадратни, колку што ќе зафаќа марината? Идејата за марината, презентирана од ВМРО-ДПМНЕ е погубна! На езеро со вредности какви што има Охридското, треба намалување и ограничување на моторниот сообраќај, а не поттикнување и зголемување!“
Како реакција на најавените проекти на ВМРО-ДПМНЕ, од СДСМ потсетуваат дека се работи за стари ветувања кои партијата ги ветува од 2013-та година.
„Пратениците од ВМРО-ДПМНЕ од Охрид, не им ја кажаа болната вистина на охриѓани – дека постоечките проекти за марината и за експресниот пат, имаат негативно влијание врз животната средина и дека никогаш нема да бидат реализирани! ВМРО-ДПМНЕ ја крие вистината од охриѓани дека со таквите проекти сериозно се загрозува нашето природно наследство – Студенчишкото блато и Галичица. Затоа, меѓународните финансиски институции одбиваат да ги финансираат ваквите штетни проекти на корумпираната власт, а Охрид годинава, ќе се најде на листата на загрозени подрачја што се под заштита на УНЕСКО. Подобро ќе беше пратениците од ВМРО-ДПМНЕ од Охрид да ѝ објаснат на охридската јавност: зошто цели четири години не е реализирана ниту една од ветените капитални инвестици?“, се вели во соопштението на ОК на СДСМ од Охрид.
Марија Теговска
