Туристичката сезона го достигнува својот врв, а дивата депонија во Струга повторно гори и ја загадува околината. Граѓаните, како и досега, реагираат и бараат трајно решение, но надлежните, и покрај поддршката на ЕУ, не можат да се справат со проблемот.
Иако пожарникарите реагирале, извори на ЦИВИЛ Медиа јавуваат за неподнослива реа и чад што се шират наоколу. И покрај острите реакции на стружани, особено по неодамнешните слични случаи на палење на отпадот на дивата депонија, што предизвикува зголемено аерозагадување, надлежните не преземаат чекори за заштита на животната средина и на здравјето на граѓан(к)ите.
Евроамбасадорот Самуел Жбогар при работната посетa на Струга, истакна дека Европската унија е подготвена трајно да ги реши проблемите со струшката дива депонија, дека се изработени елаборати за изградба на регионална депонија и обезбедени се финансиски средства, како и дека депонијата е најгорлив проблем за Струга. И локалните власти депонијата мора што поскоро да се конзервира, а првиот чекор е направен со тоа што на депонијата веќе не се остава отпад, но дека нема трајно решение без изградба на регионална депонија.
Во рамки на проектот за изградба на интегриран систем за управување со цврст отпад во Југозападниот плански регион што ќе се реализира со средства од ИПА- фондовите, од 12 предложени локации, предвидено е регионалната депонија за неколку градови од Западна Македонија, да се изгради во општината Дебарца.
Но, и тука се создаде нов проблем, поради тоа што жителите на предвидената локација – висорамнината кај селото Годивје, жестоко се спротивставуваат на таквата идеја. Во единствениот став на граѓан(к)ите кои се децидни дека никој од Дебарца не дал позитивно мислење за депонијата и дека се работи за најголемото сливно подрачје на Охридското езеро кое што е под заштита на УНЕСКО, вчера се вмешаа партиските централи од Скопје, со неуспешната седница на Советот на Општината на која требаше да се расправа за организирање на референдум.
Според „Дојче Веле“ на македонски јазик, во Македонија има 54 комунални депонии, кои ги загадуваат подземните води, почвата и воздухот, а експертите проценуваат дека 16 депонии се со висок, 16 со среден, а 19 со низок ризик за животната средина. Единствено, скопската депонија „Дрисла“ има интегрирана дозвола за управување со отпад, а покрај комуналните, кои најчесто не ги исполнуваат минималните технички услови за да аплицираат за добивање дозвола, во Македонија има уште околу 1.000 диви депонии!