Додека украинските власти бараат повеќе западно оружје, а пакетот помош од САД останува блокиран во Конгресот, Русија напредува на бојното поле во источна Украина, зазема нова територија и ги интензивира нападите за да го заземе градот Часив Јар и другите во регионот на Доњецк, пишува Вашингтон пост.
Далеку од линијата на фронтот, намалените капацитети за воздушна одбрана на Украина покажуваат ранливост, бидејќи повеќе руски ракети и беспилотни летала се способни да погодат цели како што се критичните инфраструктурни објекти.
Надвор од Кијив – кој се смета за најдобро заштитен град во Украина – најголемата електрана што му служи на главниот град беше уништена во четвртокот, предизвикувајќи загриженост дека Украина е во дефицит со ракети „земја-воздух“ за да се спротивстави на руските воздушни напади.
„Потребни ни се системи за противвоздушна одбрана и друга одбранбена помош, а не само да замижуваме и да водиме долги дискусии“, напиша претседателот Володимир Зеленски во објава на платформата X.
Украинските воени сили со месеци ја опишуваше ситуацијата на бојното поле како страшна поради недостигот на оружје и војници во услови на обновена руска офанзива.
„Ситуацијата на источниот фронт значително се влоши во последните денови. Ова главно се должи на големото засилување на непријателската офанзива по претседателските избори во Русија“, што се одржаа кон средината на март, напиша началникот на украинската армија, генерал-полковник Олександр Сирски на Телеграм.
И покрај загубите, руската армија распоредува „нови оклопни единици“, овозможувајќи и да постигне „тактички успеси“. Русите го засилија притисокот околу Часив Јар во последните денови и таа клучна источна позиција сега е „под постојан оган“, наведува официјален Кијив.
Градот на врвот на ридот е на помалку од 30 километри југоисточно од Краматорск, главниот град на регионот контролиран од Украина и важен железнички и логистички центар за украинската војска. Сирски потврди дека се зајакнати „најпроблематичните“ области, особено со противвоздушната одбрана.
„Повторно се поставува прашањето за техничка супериорност… во областа на високотехнолошки оружја. Тоа е единствениот начин на кој можеме да победиме поголем непријател“, додаде украинскиот командант, оценувајќи дека е неопходно и „да се подобри квалитетот на обуката на воениот персонал“.
Украина со месеци бара од западните сојузници повеќе муниција и системи за противвоздушна одбрана. Но, помошта е во застој поради политичките блокади во Вашингтон, принудувајќи ги украинските војници да чуваат муниција.
Г. Т.
