Градоначалниците на Скопје и на Атина, Петре Шилегов и Јоргос Каминис, денеска во грчката престолнина ќе имаат официјална средба, решени, како што самите велат, да изградат повеќе мостови на соработка и да бидат движечка сила за приближување на двете соседни земји.
Во пресрет на средбата, вчера двајцата градоначалници во заедничка колумна повикаа на зближување на двата града и затворање на отворените прашања меѓу Македонија и Грција.
Двајцата градоначалници, во колумната објавена во македонскиот дневен весник „Слободен печат“ и грчкиот дневен весник „Та Неа“, го изнесоа своето разбирање дека активирањето на преговорите создава стравови и несигурност кај големи делови од населението во двете земји, и дека таквите негативни чувства и грижи треба да се почитуваат, внимателно да се решаваат и да не се игнорираат.
– Не смееме да дозволиме националистичките гласови во двете страни да ги искористат овие чувства во обидот да го загрозат конечниот договор и повторно да ја утврдат нашата судбина и нашата заедничка иднина, не само како соседи, туку и како европски граѓани, нагласуваат Шилегов и Каминис.
На крајот од колумната тие додаваат дека како градоначалници на главните градови, решиле да го отворат патот кон поблиска соработка и силно ги охрабруваат нивните национални влади да го вложат тој дополнителен напор потребен за да не се пропушти новата можност и да се постигне договор, кој им служи на основните интереси на двете земји и гарантира подобра иднина за сите нивни сограѓани.
Јоргос Каминис, говорејќи за радиото Тема 104.6, отфрла секаква можност со Петре Шилегов да разговараат за политичките случувања и разговорите за името и открива дека наскоро ќе ја возврати посетата и со Шилегов ќе се сретне во Скопје, јавува дописникот на МИА од Атина.
[divide]
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.