Министерот за економија Крешник Бектеши, престојува во официјална посета на Софија, на покана на неговата бугарска колешка, министерката за енергетика, Теменужка Петкова. На средбата двајцата министри ја истакнале добрата соработка меѓу двете земји во областа на енергетиката, безбедноста на снабдувањето со енергија, диверзификацијата на енергетските извори, како и важноста на новите интерконекциски врски и регионалната соработка.
Посебен акцент за време на состанокот беше даден на преземањето на Претседателството со Советот на Европската унија од Бугарија, од 1 јануари 2018 година. Фокусот на бугарското претседателствување ќе биде Западен Балкан, при што бугарската страна изрази подготвеност да ја поддржи Македонија во инфраструктурните инвестиции во областа на енергијата и нејзиниот пат кон интеграција во структурите на ЕУ.
Според бугарската министерката за енергетика, за балканскиот регион голем проблем е недоволната инфраструктура, а Бугарија активно работи на неговото решавање.
За време на престојот на министерот Бектеши во Софија, се одржа и првиот состанок на работната група меѓу македонските и бугарските делегации во рамките на Меморандумот за соработка во областа на природниот гас, потпишан неодамна во Скопје (1 август 2017 година), на кој се разговараше и за можностите за изградба на нова интерконективна врска меѓу Македонија и Бугарија на полето за природен гас, вклучувајќи ги и техничките, финансиските и регулаторните аспекти на изградба на врската.
И покрај приближувањето на Скопје и Софија, како контрапотег, опозициската ВМРО-ДПМНЕ се изјасни дека сака да поднесе иницијатива до Собранието на Република Македонија за распишување референдум за Договорот за добрососедство со Бугарија.
Според ВМРО-ДПМНЕ, договорот со Бугарија носи трајни последици за македонскиот идентитет и граѓаните на Македонија имаат право да се изјаснат за него. Во одлуката на партијата стои дека на граѓаните мора да им се дозволи да го кажат мислењето за договорот со Бугарија и дека граѓаните на Македонија се чувствуваат како оштетената страна на договорот, бидејќи според ВМРО-ДПМНЕ, Македонија е страната која трпи голем број на отстапки и обврски, а Бугарија – не.
Крсте Јовановски од ВМРО-ДПМНЕ изјави дека партијата е целосно посветена на евроинтегративните процеси на државата и дека „такви асиметрични, изнудени и брзоплети договори на штета на едната страна, не се воопшто во духот на европските и демократските вредности“.
„Впрочем, добрососедство се гради со дела и со доверба, а не со негирања, заглавување во минатото и рушење на достоинството на другата земја. Ова не носи ниту иднина, ниту европски придобивки, ниту пријателство, туку само огорченост и виткање на кичмата на македонскиот народ, на македонската држава, на македонската историја и историографска наука“, изјави Јовановски.
Од друга страна, СДСМ одговори дека своевиден референдум претставувале токму изборите од 15 октомври и дека сите барања на опозицијата се зашто таа не знае како да го сокрие својот пораз на изборите.
„Резултатите од првиот круг на локалните избори недвосмислено ја докажуваат јасната поддршка на граѓаните за заедништво и соработка за кои се определи Македонија, наспроти непријателството и омразата што ВМРО-ДПМНЕ ја шири веќе 11 години. Договорот за добрососедство со Бугарија затвора долгогодишно отворено прашање и истиот е во интерес на двете држави и нивните граѓани. Тој е добар за националните и државни интереси на Република Македонија“, реагираат од СДСМ.