„Не е укинато ниту едно право на лице, односно дете со попреченост. Напротив се воведуваат и нови услуги, правата продолжуваат и понатаму и се зголемени во својот износ“, изјави Тренчевска за МИА, по денешното доделување на лиценца за работа на Центарот за дневен престој на деца со попреченост во Струмица.
Министерката Тренчевска ги оцени како невистинити тврдењата во дел од медиумите дека се укинуваат посебните средства за лицата со Даунов синдром.
Се работи за осум деца од вкупно 121, за кои медицинската документација била некомплетна и дека при посетата на соодветната комисија за проценка добиле негативен наод. Тренчевска додаде дека комисијата ќе направи повторен увид во случаите, а воедно апелира до медиумите за вистинито информирање.
Во образложението од Министерството за труд и социјална политика за Рацин.мк, се истакнува дека родителите коишто се жалат дека немаат одобрено користење на посебниот додаток, односно за 8 од вкупно 113 со даунов синдром, биле известени да поднесат жалба на првите наоди, и во второстепена постапка повторно да се направи проценка на нивната попреченост и доколку постојат услови и за нив ќе биде променета одлуката на Комисијата за проценка.
Од МТСП дополнуваат дека оваа ситуација доаѓа од примената на новиот модел за проценка на потребите за лица со попреченост изработен во согласност со Меѓународната класификација на функционирање (МКФ).
МКФ ги класифицира здравјето и состојбите поврзани со здравјето таа не ги класифицира луѓето, туку ја опишува ситуацијата на секој поединец во низа домени на здравјето или домени поврзани со здравјето. Покрај тоа, описот секогаш се дава во контекст на срединските и индивидуалните фактори, велат од МТСП.
Во овој случај се работи за дезинформации што ѝ се пласираат на јавноста, преку манипулација со поединечни случаи. Поточно се работи за користење на информациите кои се однесуваат на дел од корисници на одредени социјални бенефиции, за да се прикажуваат како општа практика на министерството.
ЦМТ
