По најновиот масивен комбиниран бран од рускиот ракетен терор врз цивилни цели низ целата земја, се обрати претседателот на Украина, Володимир Зеленски.
„Во текот на оваа ноќ и утро, руските терористи користеа дронови од различни типови, вклучувајќи ‘шахеди’, крстосувачки, балистички и аеробалистички ракети: ‘циркони’, ‘искандери’, ‘кинжали’. Вкупно околу 120 ракети и 90 дронови“, рече претседателот Зеленски во видео обраќањето на Телеграм.
Тој ја извести украинската и светската јавност дека силите за противвоздушна одбрана уништија повеќе од 140 воздушни цели.
„Целта на непријателот беше нашата енергетска инфраструктура низ цела Украина. За жал, има оштетувања на објекти поради директни удари и паѓање на остатоци. Во Николаев, поради напад со дрон, две лица загинаа, а шестмина се повредени, од кои две деца. Моето сочувство до семејствата и блиските на загинатите“, изјави Зеленски.
Моментално, во Украина има подрачја без струја, но сите неопходни сили се ангажирани за отстранување на последиците и обновување, нагласи украинскиот претседател, кој им се заблагодари на силите на одбраната за нивната бестрашна борба за одбрана на земјата.
„Благодарност до сите наши сили за противвоздушна одбрана кои учествуваа во одбивањето на овој напад: противвоздушните ракетни единици, нашата авијација – пилотите на F-16, Су и МиГ, мобилните огнени групи, РЕБ – сите организирано работеа. Ви благодарам за сигурната заштита!“, рече претседателот на Украина во видео обраќањето.
Зеленски се осврна и на претходните денови на рускиот ракетен терор, откривајќи дека „во текот на неделата агресорот користеше речиси 140 ракети од различни типови, повеќе од 900 наведувани авијациски бомби и над 600 ударни дронови“.
„Денес нашите пилоти на F-16 соборија околу 10 воздушни цели. Во моментов се отстрануваат последиците од комбинираниот напад врз нашата инфраструктура во Ривненската, Лвивската, Днипропетровската, Волинската и Одеската област“, рече претседателот на Украина.
Тој потсети дека рускиот агресор се обидува да ги заплаши Украинците со студ и недостаток од струја. Според него, на светот му е потребно единство, како што рече, „само заедно можеме да го запреме ова зло“.
„Руските терористи повторно се обидуваат да нè заплашат со студ и недостаток на струја, повторувајќи ги своите дејства со надеж за резултати. Целиот свет гледа и знае дека ние се браниме од апсолутното зло, кое не разбира никаков јазик освен јазикот на силата. Нам ни е потребно единство, на светот му е потребно единство. Само заедно можеме да го запреме ова зло“, рече претседателот Зеленски.
Како и претходните, така и во текот на 2024 година, рускиот агресор безмалку секојдневно спроведува ракетен терор врз цивилното население и цивилни инфраструктурни цели. Се ближи црн јубилеј од 1000 денови целосна руска агресија против Украина, која започна на 24 февруари 2022 година.
Подготви: Џ. Д.
