По анкетата што ја објави ТВ Телма, а според која, речиси 60 отсто граѓани се задоволни од реализацијата на новата Влада во првите три месеци, ВМРО-ДПМНЕ реагира дека само на предвремени парламентарни избори, „граѓаните ќе покажат што мислат за расипничкото и неодговорно владеење на СДСМ“!
Од оваа опозициона партија велат дека само на предвремени избори ќе се расчистат дилемите, зашто, во ВМРО-ДПМНЕ се убедени дека е невозможна таква промена на ставот на граѓаните во однос на анкетата спроведена во јули, којашто покажала драстично поинакви разултати.
„Според анкетата од крајот на јули, резултатите од МЦМС покажале дека ВМРО-ДПМНЕ e со стабилна предност пред СДСМ. Имено, на прашањето доколку утре се одржат избори – за која партија би гласале, 27,1 отсто од испитаниците се одлучиле за ВМРО-ДПМНЕ, додека за СДСМ биле 22,7 отсто. Народот најдобро ќе каже дали се случило нешто во последните 30 дена, за така драстично да се смени мислењето, односно, дали Законот за двојазичност, Договорот со Бугарија, укинувањето на планираното зголемување на пензиите или тендерите, коишто Кочо Анѓушев си ги доделува себеси, придонеле за зголемување на рејтингот на Зоран Заев“, реагираат од ВМРО-ДПМНЕ.
А, според анкетата на ТВ Телма и МЦМС, спроведена телефонски од 4 до 11 август, на репрезентативен примерок од 1.005 испитаници, од агенцијата М-Проспект, има значајна промена во рејтинзите на двете најголеми партии, СДСМ и ВМРО-ДПМНЕ. Оваа анкета проектира победа на СДСМ на локалните избори, во цифра поголема од можната статистичка грешка во анкетата, и бележи пораст на рејтингот на Зоран Заев и пад на рејтингот на Никола Груевски.
Од политиките на Заев се задоволни околу 60 отсто граѓани, а 35% не се задоволни. Околу 38,5% од граѓаните сметаат дека Владата се фокусирала најмногу на надворешната политика, а само 7,7% на социјална заштита. Над 34% граѓаните очекуваат новата Влада да се посвети на отворање работни места, 18,4% на економскиот развој, за 10,4% испитаници, приоритет треба да биде здравството, а само за 8,6% -надворешната политика.