„Зимно време струја немаме, летно време вода немаме. Секогаш пред избори политичарите доаѓаат и нè лажат, откако ќе поминат изборите никаде ги нема“, ѝ вели еден жител на битолски Баир на граѓанската новинарка, која отиде да види дали по пет месеци е нешто сменето по објавата на ЦИВИЛ, дека во битолски Баир луѓето со децении живеат без капка вода.
Друга жителка на оваа сиромашна населба додава дека градоначалничката на oпштина Битола, Наташа Петровска, им ветила дека ќе го среди проблемот со струјата и водата.
„Наташа ни вети дека ќе ни се исполни желбата да имаме вода. Но, сега уште малку ќе дојдат избори и сакам да ѝ порачам на Наташа да нè има во предвид и да го реши проблемот, инаку воопшто да не праќа луѓе да нè убедуваат да гласаме, оти, како ќе дојдат, така и ќе си заминат. Во Баир никој нема да гласа“, вели таа.
„Пред избори доаѓаат и нè лажат дека, ако гласаме, ќе го средат проблемот со водата и ни даваат по 500 денари да гласаме. Зошто да го дадам мојот глас за 500 денари?“, вели еден жител на Баир, кој сака да остане анонимен.
Жителите велат дека неколку пати го блокираа патот за државата и општината да ги слушнат и нивните проблеми.
„Во училиште децата ги пуштаме да одат со вошки, бидејќи немаме вода да ги избањаме“, вели една изреволтирана мајка.
Пред пет месеци, на 6 неомври 2018 година, дел од тимот на ЦИВИЛ, заедно со тим од граѓански новинари, ја посети населбата Баир и оствари средба со градоначалничката на Битола, Наташа Петровска и директорот на ЈКП Водовод, Горан Козаров кои истакнаа дека знаат за тој проблем и се трудат да го решат.
Меѓутоа, и по пет месеци откако ЦИВИЛ објави за проблемите со кои се соочуваат баирчан(к)и, нема никаква реакција од локалните и централните власти.
Дали навистина Ромите во Баир се бројат и гледаат само како гласачка машинерија?!
Обработка на текст: Дехран Муратов
Камера и фотографија: Јована Здравевска (граѓанска новинарка)
Монтажа: Биљана Јордановска
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон.
Врз основа на договор за соработка, оваа содржина е достапна за Плусинфо и Слободен печат без ограничувања.
