Шефицата на набљудувачката мисијата на ОДИХР, амбасадорката Одри Гловер, во манир својствен на британската дипломатија, ги презентираше прелиминарните заклучоци од мониторингот на локалните избори. Ги лоцираше проблемите точно, сепак, без многу заобиколувања својствени токму за британската дипломатија.
Директно и соголено од претерани дипломатски флоскули, ОДИХР започна да ги соопштува своите наоди уште во 2013 година, кога шеф на мисијата беше познатиот германски дипломат, амбасадорот Герт Аренс, кој ја „почести“ Македонија со исто толку остар извештај и во 2014 година. Слично беше и во 2016 година, под водство на италијанската дипломатка, амбасадорката Тана де Зулуета. Од избори во избори, се говори за „замаглената граница меѓу партијата и државата“, израз кој го употреби мисијата во времето на Герт Аренс.
Одри Гловер кажа дека премиерот Зоран Заев, во кампањата за поддршка на другарчињата од ДУИ, вети дека општините во кои ќе победи ДУИ, ќе добијат помош од неговата влада, нивните ветувања да се исполнат. И ние го кажавме и напишавме тоа неброен број пати во соопштенијата и на пресовите кои ги држев во име на ЦИВИЛ уште пред првиот круг на локалните избори.
Навистина, СДСМ и Заев направија квантен скок во одвојување на партијата од државата со тоа што одеа во кампања по работното време, со партиски или приватни возила. И таму имавме сериозни примедби, но имавме и пофални зборови, заслужени. Сепак, кога дојде ред да се одбрани коалициското другарче Али Ахмети, сѐ појде низ вода. Тоа што ќе поминеше во најдобар ред, мораше да се упропасти со завршните чекори во кампањата која изненади, разочара или збуни многумина.
Со непринципиелните калкулации и потрага по краткорочни политички ефекти, безмилосно удрија дури и по коалицискиот партнер, Зиадин Села, кој го почувствува здивот на смртта во ходниците на Собранието кога беше нападнато од ордата на Груевски. Дотолку повеќе што таа и таквата поддршка на ДУИ, за миг, ги врати горчливите спомени на режимот.
Изгледа дека, кога ДУИ е во прашање, тоа е неизбежно. Тие играат валкано, типично вмровски, ги користат сите алатки кои ги користеа и порано кога беа во братко-разбојничка прегратка со Груевски. Тоа е суровиот и валкан прагматизам на политиката. За жал, и една интелектуалка каква што е Теута Арифи, се најде вплетена во таа валкана игра, а уште поголема штета е што последните денови од партиското дејствување на првиот СДСМ-овец фрлија дамка на првиот изборен процес по падот на режимот на Груевски.
Уште потемна дамка на изборите фрли изборната администрација. Една тревожна приказна во која допрва мора да се расветли во која пропорција се партиско-политичките сплетки и блокади, а во која незнаењето и неразумното трошење на јавните ресурси.
Слободно беше изразена волјата на најголем број гласачи. Да. На најголем број. Но, не и на сите. Слободата (и животот) им припаѓа на сите. Точка!
објавено во Плусинфо и во Слободен печат (01/11/2017)
