Во Владата предводена од Христијан Мицкоски почнаа несогласувањата помеѓу владините партнери ЗНАМ и коалицијата Вреди.
Лидерот на ЗНАМ, Максим Димитриевски, на поткастот на Канал 5, се закани дека ќе излезат од Владата ако албанското знаме остане како декор во владините кабинети на министрите Албанци од Вреди,
„Ова е само ДУИ-наратив што продолжува во континуитет. Ако продолжи таквиот однос, непочитување, таквото однесување, нема да бидеме дел од Владата. Нормално дека ќе излеземе. Нема да дозволувам како лидер на нова политичка партија да ни се случуваат вакви нешта со кои се покажува елементарно непочитување на државата и на македонскиот народ“, рече Димитриевски.
Градоначалникот на Тетово и претседател на Движење Беса, Биљал Касами кој е дел од коалицијата Вреди, истакна дека не е Димитриевски тој кој одредува кога и како ќе се користи националното знаме.
„Посакуваме коалицискиот партнер, во случајов претседателот на ЗНАМ, да излезе од предизборната реторика и да разбере дека сега сме дел од власта и мора да работиме за доброто на граѓаните. Ние како граѓани Албанци на оваа држава ги почитуваме и поддржуваме граѓаните на македонската заедница во заштитата на нивниот идентитет, а истото го очекуваме и од македонските граѓани да ги поддржат Албанците во заштитата на нивниот идентитет, националното знаме е важен сегмент од ова“, рече Касами при промоција на реконструкцијата на локалниот пат што води кон тетовското село Стримница.
На изјавата на Димитриевски реагираше и Кренар Лога, генералниот секретар на Алијанса за Албанците, кој е дел од колацицијата Европски фронт, кој истакна дека никој не може да им забрани на Албанците да го користат нивното национално знаме.
„Димитриевски може да дозволи или да забрани знамиња во неговиот приватен дом. Владата е дом на сите граѓани на Северна Македонија, а следствено и на 1/3 од вкупното население, во овој случај Албанците. Сите заедници може да го користат своето знаме, а кои се дел од преамбулата на оваа држава, како турското, бошњачкото, влашкото, ромското, египетското итн. Државното знаме на Северна Македонија е почитувано од сите и затоа сите треба да ги почитуваат соодветните симболи. Таканаречениот српски етноцентризам се појавува како црн облак над нашата земја, и е лош знак, затоа запрете ги експериментите врз државата која секој ден сè повеќе се обидувате да ја поделите и разедините. Засукајте ги ракавите и работете за иднината на оваа земја, доста со постизборна кампања“, вели Лога, кој е дел од Европскиот фронт.
Дехран Муратов