Уставни измени
Продолжението на Комисијата за уставни прашања за претресот на Предлогот за пристапување кон уставни измени почна во 14 часот. Предлогот за уставни измени го образложи премиерот Зоран Заев. Во дебатата по претресот учествуваа пратеници од сите пратенички групи, вклучувајќи ги и пратениците од ВМРО-ДПМНЕ кои гласаа против дневниот ред.
Пратениците на ВМРО-ДПМНЕ денеска пред почетокот на продолжението на седницата на Комисијата за уставни прашања одржуваат координација со партиското раководство. Координацијата се одржува во седиштето на ВМРО-ДПМНЕ.
Потпретседателот на Собранието, Горан Мисовски денеска ги повика пратениците од ВМРО-ДПМНЕ на пленарната седица во понеделник да ги поддржат уставните измени и заеднички да ја обезбедат европската иднина на граѓаните.
Траекторија
На денешното рочиште за случајот „Траекторија“ се читаше извештај од 31 мај 2017 година со дата-бази од СМС-пораки меѓу Миле Јанакиески и Зоран Ставрески. На судењето беа присутни сите обвинети и нивните бранители. во судот беа прочитани вкупно 103 пораки што биле разменети меѓу Јанакиески и Ставрески во периодот од 16 мај 2012 до 3 април 2013 година.
Во „Траекторија“ се обвинети поранешниот премиер Никола Груевски, поранешниот вицепремиер Владимир Пешевски, ексминистерот за транспорт и врски Миле Јанакиески и поранешниот директор на ЈП „Државни патишта“, Љупчо Георгиевски. Според обвинението на СЈО, тие ги пречекориле овластувањата при изборот на компанија за изградбата на автопатските делници до Штип и Охрид.
Нови истраги на СЈО
Јавното обвинителство за гонење на кривични дела поврзани и кои произлегуваат од содржината на незаконското следење на комуникациите отвори шест нови истраги. Во овие истраги станува збор за основано сомнение за предизвикана финансиска штета на Буџетот на Република Македонија во износ од речиси 80 милиони евра.
Титаник 3
Судењето за предметот на СЈО „Титаник 3“, во кој се обвинети Ејуп Аљими и Исмет Гури, затоа што како членови на Општинската изборна комисија во Чаир на локалните избори во 2013 година „уништувале изборен материјал“, денеска почна од почеток поради промена на судската порота.
Фалсификувани дипломи
Според Министерот за внатрешни работи на Р. М. Оливер Спасовски, во Министерството за внатрешни работи биле откриени 40 вработени кои имале фалсификувани факултетски дипломи. Овие лица, според Спасовски, стигнале и до значајна функција во МВР, но, по откривањето добиле отказни решенија и кривични пријави. Кривични пријави, биле поднесени и до факултетите кои ги издале тие дипломи.
Полициски униформи – има или нема?
Независниот синдикат на полицијата денеска повторно се пожали дека полициските службеници немаат добиено униформи.
Министерството за внатрешни работи категорично ги отфрла како неточни тврдењата изнесени на прес-конференцијата на претставниците на Независниот полициски синдикат околу наводното неспроведување на активностите за набавување на нова опрема за полициските службеници.
Гарантиран минимален приход
Македонија е прва земја во регионот што ќе воведе гарантиран минимален приход. Според министерот за финансии Драган Тевдовски, одржливиот раст може да се постигне само преку вложување во подобар живот за граѓаните, односно преку подобар систем на социјална заштита.
Фасади
По реакциите на јавноста за градежните потфати врз фасадата објектот на Градскиот Архив во Тетово, работењето е прекинато и објектот е ставен во процедура за заштитено културно наследство.
Општина Аеродром со вонредна седница
Општина Аеродром за денеска најави вонредна седница на Советот на Општината, со почеток во 16:30 часот. Седницата доаѓа по изјавата на градоначалникот Златко Марин, по протестите на жителите на Аеродром за спорниот ДУП И10. На вонредната седница советниците ќе се обидат да најдат трајно решение за спречување на градбата пред Мајчин дом.
Во средата на прес конференција, Марин изјави дека 15 дена ќе се стопираат градежните активности и дека се надева на решение во интерес на граѓанките и граѓаните.
Супернова
Др. Тања Петрушева од Македонија е дел од тимот на астрофизичарите коишто за прв пат најдоа доказ за експлозија на супернова која формирала неутронска ѕвезда која многу блиску орбитира до друга неутронска ѕвезда. Студијата била предводена од тим од Калифорнискиот институт за технологија.
Д. Тахири
