ВЕСТ НА ДЕНОТ
Пендаровски и државниот врв работно во САД
Државна делегација предводена од претседателот Стево Пендаровски од денеска до 22 септември ќе учествува на 78. сесија на Генералното собрание на Обединетите нации во Њујорк. Пендаровски се очекува да има свое обраќање во Генералната дебата на 78. сесија на Генералното собрание на Обединетите нации, што се одржува на тема „Обнова на довербата и повторно стартување на глобалната солидарност: Забрзување на акцијата за Агендата 2030 и нејзините Цели за одржлив развој кон мир, просперитет, напредок и одржливост за сите“.
Во Њујорк е и министерот за надворешни работи, Бујар Османи, кој во рамките на Генералната дебата на ОН, денескаприсуствуваше на состанокот на министрите за надворешни работи од државите на Западен Балкан, во организација на вицепремиерот и министер за надворешни работи на Италија, Антонио Тајани. Османи се сретна и со министерката за надворешни работи на ЈАР Греис Наледи Мандиса Пандор со која ќе го потпишат Комуникето за воспоставувањето дипломатски односи со Јужноафриканската Република.
А во САД е и премиерот Димитар Ковачевски, со вицепремиерто за европски прашања Бојан Маричиќ. Ковачевски ќе оствари средби со управниот директор на Светскиот економски форум, Мирек Душек, со управната директорка на Светска банка, Ана Бјерде, како и со заменикот помошник државен секретар на САД и специјален претставник за Западен Балкан, Габриел Ескобар и со специјалниот претставник на ЕУ за Западен Балкан, Мирослав Лајчак.
ИЗЈАВА НА ДЕНОТ
„Луѓето да протестираат, тоа е загарантирано со Уставот на Република Северна Македонија. Јас лично како човек и како министер, мислам дека тоа е најдемократски чин и секој има право да протестира. И јас ги поддржувам ваквите протести. Но, тоа што сакам да напоменам, секогаш, гледаме со случајот „Онкологија“ дека се злоупотребува. Апелирам за дневни политички евтини поенти да не се користат ваквите протест“, изјави денеска министерот за здравство Фатмир Меџити.
ВОЈНА ВО УКРАИНА
Деокупацијата на Клишчиивка создава мост за понатамошна офанзива на Вооружените сили на Украина. Деокупацијата на Клишчиивка првенствено им овозможува на украинските сили да воспостават контрола над логистичките патишта што ги користат руските трупи за доставување на материјали до привремено заземениот град Бахмут.
*
Канада ќе одвои 24,5 милиони долари за заедничка набавка на одбранбена опрема со Велика Британија за системи за противвоздушна одбрана за Украина, изјави вчера канадскиот министер за одбрана Бил Блер.
ФЛЕШ ВЕСТИ
ЕКОНОМИЈА Во маркетите ќе бидат означени цените на производите што ќе поевтинат за 10 проценти и што ќе бидат опфатени со владината одлука што се очекува да биде донесена утре, најави денеска министерот за економија Крешник Бектеши.
РЕГИОН Во Албанија се зголемува бројот на заразени со коронавирус и според Институтот за јавно здравје позитивен резултат е добиен кај 40 отсто од тестираните. Само во последната недела во Албанија се направени 2.000 тестови за Ковид-19, а речиси половина, односно над 900 се позитивни.
СОЦИЈАЛА Министерката за труд и социјална политика Јованка Тренчевска до крајот на месецот очекува конкретни предлози во однос на пензиите, со фокус на пензионерите со ниски месечни примања.
AL-PRESS
Редакциски избор од албански медиуми: Се бара вклучување на САД во бриселскиот дијалог; можни дополнителни мерки за Косово; во Албанија продолжува мега- операцијата „Темпули“
АНАЛИЗИ
Цивил – Центар за слобода, како организација за човекови права вложува огромни напори за демаскирање на руската пропаганда и дезинформации во Северна Македонија, ги препознава и нотира проруските наративи и пропагандата на Кремљ, при што забележува дека руските пропагандни наративи најдоа плодна почва во македонските медиуми, и, за жал, и покрај големите напори што се вложуваат за разобличување на – про Кремљ наративите кај нас, проруските наративи во македонските медиуми не само што се уште опстојуваат, дури во последно време во одреден дел и земаат замав, пишува во анализата на ЦИВИЛ Мониторинг тимот, „Засилена руска пропаганда во македонските медиуми во пресрет на гласањето за уставните измени“.
ИНТЕРВЈУ
СЛОБОДНА ЗОНА
“Кога и зошто не разбравме каде е силата во демократијата? Многу ли грешам, ако кажам дека не е до гласот на мнозинството, туку до влијанието на најдобрите и најодговорните, на домаќините. Но, како тоа влијание да стане мнозинско и да не биде надгласувано од есапчиите кои би гласале и за најслабиот во одделението (класот) ако е нашминкан, дотеран, иако знаат дека е обичен „суртук“. Ете, толку знам јас за демократијата на денот кој се нарекува ДЕН НА ДЕМОКРАТИЈАТА. А секое писмо некогаш завршуваше од прилика вака: и ете ти пишав како сум и како живеам, со здравјето сум добро и истото ти го посакувам и на тебе. Поздрави ги сите што ме знаат, а и оние што не ме знаат. До скоро видување, каде и да се случи, на следните избори“, пишува Војо Маневски во „Писмо до боговите и господарите: Не е до гласот на мнозинството, туку до влијанието на најдобрите и најодговорните“.
Подготви: Б. Јордановска
