ВЕСТ НА ДЕНОТ
Северна Македонија на задоволително ниво имплементираше 13 од 23-те препораки содржани во Извештајот за евалуација од петтиот круг, девет се делумно имплементирани и една не е имплементирана, се наведува во вториот извештај за усогласеност на Групата на држави против корупција (ГРЕКО) при Советот на Европа. ГРЕКО заклучува дека Северна Македонија е „во недоволна усогласеност“ со препораките содржани во Извештајот од петтиот круг на евалуација и го поканува шефот на Делегацијата на Северна Македонија да достави извештај за напредокот во имплементацијата на преостанатите препораки што е можно поскоро, но најдоцна до 30 јуни 2024 година.
Единствено неимплементирана, според ГРЕКО, е препораката за анализа на практичната примена на системот на санкции во однос на прекршување на правилата/легислативата за конфликт на интереси, интегритет и антикорупција и обезбедување дека санкциите се ефикасни, пропорционални и одвратувачки.
ИЗЈАВА НА ДЕНОТ
„Датумот на изборите треба да го договорат сите политички партии, а не само две. Датумот на изборите е предмет на дискусија меѓу сите политички партии, а не само на две политички партии. И Изборниот законик и одржувањето на изборите се прави согласно со закон и Устав, согласно со мандати. Оваа година имаме карактеристични избори бидејќи имаме и претседателски и парламентарни избори“, смета премиерот Димитар Ковачевски, кој денеска изјави дека работните групи на партиите треба да го договорат терминот за избори и другите детали во врска со нив.
ВОЈНА ПРОТИВ УКРАИНА
Украина уништи цели на руските аеродроми во окупираните Луганск и Бердијанск со американски ракети со долг дострел.
*
Украинските одбранбени сили ги извршуваат своите јуришни мисии кон градот Бахмут и остварија одредени придобивки во областа на Роботин на оската Мелитопол, соопшти портпаролот на Генералштабот на вооружените сили, Андриј Ковалиов, кој зборуваше во етерот на националниот телетон
ФЛЕШ ВЕСТИ
БЕЗБЕДНОСТ Во европскиот месец на кибер безбедноста – октомври, Народната банка направи брошура за безбедност при користење дигитални финансиски производи и услуги со препораки како граѓаните да се заштитат при користењето на овие услуги, како да ги заштитат своите уреди и своите лични податоци, но и што треба да преземат ако се посомневаат во онлајн измама.
ОДБРАНА Министерката за одбрана, Славјанка Петровска денеска се сретна со директорот на директоратот за одбранбено планирање во Алијансата, Карл Форд кој заедно со неговиот тим учествува на редовните билатерални консултации помеѓу Република Северна Македонија и НАТО- Алијансата.
ИНТЕГРАЦИИ Евроамбасадорот Дејвид Гир денеска порача дека има многу силна поддршка за европската иднина на државава и изрази надеж дека државава ќе се придвижи напред со усвојување на уставните измени и спроведување на реформите.
ОСУДА Меѓународната заедница го осуди нападот врз болница во Газа.
АЛ-ПРЕС
Редакциски избор од албански медиуми: Макрон бил погрешно преведен; Албанија и Косово го осудија бомбардирањето на болницата во Газа.
Подготви: Б. Јордановска