Пензионираниот новинар и публицист Владимир Перев (80), деклариран Бугарин од Македонија, објави дека бил вербално и физички нападнат во маркет во Скопје. Според неговата колумна на „Трибуна.мк“, нападот го извршил маж на околу 40 години кој заедно со него чекал на каса.
Перев пишува дека непознатиот маж почнал да му се дере со навреди „да си оди во Бугарија“, дека ќе го „убие“ ако зборува за Македонија и го нарекувал „фашист“. Напаѓачот, вели тој, го удрил и му ги скршил очилата. Откако Перев се обидел да се одбрани со чадор, напаѓачот почнал да глуми жртва, но двајца купувачи го предупредиле да престане.
По инцидентот, Перев го пријавил случајот во полициската станица „Беко“. Тој смета дека нападот можеби бил намерно насочен, со оглед на неговите јавни ставови.
Во текстот Перев предупредува на, како што вели, растечки национализам, шовинизам и антибугарска реторика во Македонија. Наведува дека по нападот контактирал со бугарската амбасада и со шефот на бугарската дипломатија Георг Георгиев, кои му понудиле поддршка.
Бугарското МНР го осуди инцидентот како „уште еден чин на насилство и омраза“, барајќи од македонските институции ефикасна истрага и оценувајќи го случајот како тест за постапување по злосторства од омраза.
Од таму додаваат дека министерот за надворешни работи на Бугарија, Георг Георгиев, веднаш стапил во телефонски контакт со повредениот Перев и му ветил целосна поддршка.
„Очекуваме надлежните органи во Република Северна Македонија да преземат навремени и ефикасни мерки за истрага и правда. Потсетуваме дека европскиот пат на земјата бара целосно и совесно спроведување на европскиот компромис од 2022 година, вклучително и почитување на заедничките вредности и гарантирање на правата на македонските Бугари“, се вели во реакцијата на бугарското МНР.
Министерството за внатрешни работи на Македонија потврди дека случајот е пријавен и дека се преземаат сите мерки за идентификација и приведување на сторителот.
Д. Муратов
