Синдикатот на АРМ бара од Владата поголем буџет за вработените во Министерството за одбрана, а во тие рамки, и за припадниците на македонската Армија. Според оценките, политичката одлука на Владата да се членува во Алијансата, не значи и практична, целосна подготвеност и усогласеност на АРМ со НАТО стандардите.
„Апелираме до Владата на Република Македонија, дека ако сака да има здрава Армија и безбедна држава, тогаш мора да си ги исполнува обврските, коишто ги презеде на времето кога првпат аплициравме во НАТО структурите. Тогаш, ние како држава, покажавме подготвеност дека ќе ги почитуваме НАТО принципите, во смисла на финансирање, а тоа е дека ќе оддвојуваме од 2.3% до 2.5 % од БДП. Во моментов, за жал, значи за 2017, нашиот буџет е 0,9% или 1,0 % што е два пати помалку од декларираната вредност, кога сме поднесувале пријава за членство во НАТО. Тоа значи, ако сакаме да ги подобриме условите во Армијата и да влеземе во НАТО, навистина како што треба, како здрава Армија, комплетно кооперативна со НАТО структурите, ние мора да ги зголемиме средствата од буџетот на Република Македонија за Министерството за одбрана, а со тоа, и буџетот на АРМ“, изјави за ЦИВИЛ Медиа, Ристо Ајтов, претседателот на Синдикатот на АРМ.
Според Ајтов, без да се зголеми буџетот на Министерството, не ќе може да се остварат неопходните стандарди во АРМ.
„Тоа ќе значи добри униформи, добро вооружување, технички исправни средства во секој момент… Бидејќи ние, во моментов, имаме квантитет, а не квалитет. Мора да вложуваме во нови средства. И технологијата оди напред, ние мора да ги следиме чекорите на технологијата. Свесни сме дека чекорите во технологијата, со вооружувањето не можеме да ги следиме на ниво на САД, Германија или други поголеми светски сили, но можеме во оној сегмент што значи доволно технологија за безбедноста и мирот на граѓаните на Република Македонија, да го гарантира Армијата, заедно со полициските сили“, потенцира Ајтов.
Тој оценува дека изминатите 25 години од формирањето, не донесоа прогрес на АРМ.
„Политичка е одлуката дека Република Македонија ќе влезе во НАТО, но дека АРМ е целосно подготвена – ние во Синдикатот мислиме дека не е баш така! Ова го поткрепуваме со факти. Платите на вработените во Министерството за одбрана, односно во АРМ, се на многу ниско ниво. Потоа, нивото на опременост, се мисли на облека, обувки, вооружување односно технички средства е на многу ниско ниво, и она што го имаме е значително застарено“, коментира Ајтов.
Моника Талевска
Камера: Дехран Муратов