Претседателот на Македонија, Ѓорге Иванов, повторно ја шокира јавноста со своите одлуки, да замине на службен пат во Азербејџан, додека целата држава е во хаос. Според информациите, Иванов во четврток и петок, ќе учествува на Глобалниот форум „Иднината на меѓународните односи: моќ и интереси“, што ќе се одржи во Баку, каде ќе присуствуваат и неговите колеги од Албанија, Црна Гора и Летонија. Домаќин на Глобалниот форум е азербејџанскиот претседател, Илхам Алиев, кој минатиот месец ја назначи својата сопруга, Мехрибан Алиева за потпретседател.
Своето службено патување, Иванов го испланира во време кога државата нема влада, нема Собрание, кога илјадници граѓани стимулирани од ВМРО-ДПМНЕ протестираат по улиците, а меѓународната заедница му врши силен притисок на Иванов, да му го додели мандатот на новото парламентарно мнозинство.
Ваквата одлука на Иванов, се чини дека е потврда на веќе познатиот став во јавноста, дека нема да му го додели мандатот на новото парламентарно мнозинство од 67 пратеници, што го сочинуваат СДСМ (49), ДУИ (10), Беса (5) и Алијанса за Албанците (3).
Изминаа три месеци по изборите кои се одржаа на 11-ти декември 2016, а политичката криза во државата секој ден е сѐ посложена. ВМРО-ДПМНЕ по 10 години владеење на последните избори, освои 51 пратеничко место, а ДПА – два мандата во Собранието. Политичката и безбедносната состојба во државата станува секој ден се посложена, откако партиите од албанскиот блок, ја усвоија т.н. Албанска платформа во Тирана. Потоа, пропадна обидот на ВМРО-ДПМНЕ да коалицира со ДУИ. СДСМ и ДУИ, сепак, постигнаа некаков заеднички договор и формираа парламентарно мнозинство. Неоткривањето на деталите на нивниот договор, создаде простор за низа шпекулации и спинови, кои масовно се продуцираат преку провладините медиуми, дека со Албанската платформа, ќе се раздели и кантонизира Македонија, ќе се загрози нејзиниот суверенитет, интегритет и иднина во овие граници.
Оттогаш, протестите се секојдневни. Не помогна ниту пресот, поточно екпозето на Зоран Заев во кое јасно ја презентираше програмата на идната влада. Тој нагласи дека Македонија ќе ја зачува својата унитарност, и дека ниту едно барање од Платформата, надвор од Уставот, нема да биде прифатено. Но, изјавите од ДУИ, веднаш по пресот на Заев, имаа сосем друга насока.
Од соседна Албанија стигнаа и милитантни пораки од актуелната пратеничка Дода Месила.
И во целиот овој хаос, претседателот на државата, заминува на службен пат, во стилот „селото гори, бабата се чешла“?! А, само Иванов може да ја извлече земјата во моментов од криза, со една разумна и уставна одлука. Но, тој и натаму избира да остане во заштита на интересите на ВМРО-ДПМНЕ и на нејзините челници, со чија помош дојде на претседателската функција.
Моника Талеска
