Во овие најтешки мигови за нашата земја и за мене лично, сакам да соопштам дека поднесувам неотповиклива оставка од функцијата градоначалник на Кочани, објави Љупчо Папазов на својата Фејсбук страница.
„Оваа загуба е огромна! Не постојат зборови што можат да ја опишат болката што ја чувствуваме сите. Тие деца беа наши деца. Ги познавав повеќето од нив, ги познавав и нивните семејства, а со дел од нив сме и семејни пријатели. Шокот и скршеноста што ги чувствувам ќе траат целиот мој живот. Оваа трагедија ги остави Кочани и Македонија во црнина, а празнината што остана е непреболна“, вели Папазов.
Тој побара од сите надлежни институции да ја испитаат одговорноста на сите инволвирани!
„Непостапувањето е исто така одговорност. Мора да се истражат сите детали, да се најдат сите пропусти, а сите лица што придонеле кон оваа трагедија мора да одговараат. Јас се ставам целосно на располагање на институциите. Иако според закон немав директни надлежности во овој случај, подготвен сум да одговорам на сите прашања за сè, како и за моите лични постапки“, вели Папазов.
Тој повикува на доблест и целосна одговорност. Доколку постои било каков основ за одговорност кај него, тој го повикува обвинителството да го испита тоа и да постапи согласно законите.
„Нема зборови што можат да ја опишат мојата болка! Но, во овие моменти, мора да покажеме доблест, да манифестираме целосна одговорност и да покажеме разлика во начинот на постапување. Со нашето однесување мора да дадеме пример дека се спротивставуваме на системот кој не функционира. Доколку постои било каков основ за одговорност кај мене, го повикувам обвинителството да го испита тоа и да постапи согласно законите“, вели Папазов.
Градоначалникот во оставка сподели со јавноста зошто во текот на вчерашниот ден не излегол во јавноста. Причината за тоа, како што вели, е затоа што е скршен и дека тешко ќе ја преживее трагедијата на градот чија управа ја раководеше.
„За мене, после оваа трагедија, ништо повеќе нема исто значење! Ова беа наши деца! Многумина, со право, забележаа зошто вчера не излегов во јавност цел ден. Но, тие што ме познаваат знаат колку сум скршен и како го доживувам ова што се случи. Тешко е, и тешко ќе го преживеам“, вели Папазов.
На крајот, Папазов завршува со ставот дека никогаш не би помислил дека вака ќе заврши неговиот ангажман како градоначалник.
„Работев чесно и посветено целиот свој живот! Никогаш не сум ни помислил дека вака ќе заврши и мојот ангажман, но сега се повлекувам од оваа функција, молејќи го Бога за душите на нашите деца, за нивните семејства и за народот на Македонија!“, вели Ппазов.
Министерот за внатрешни работи Панче Тошковски, меѓу другото, изјави дека со Папазов вчера беше извршен службен разговор и дека, доколку се утврди било каква одговорност, тој ќе биде санкциониран.
Д. Муратов
