Претседателот Ѓорге Иванов нема да го даде мандатот на СДСМ, сѐ додека оваа второрангирана партија на изборите, не достави доказ за обезбедени 61 пратенички мандат, односно, за парламентарно мнозинство. Ова го изјави лидерот на СДСМ, Зоран Заев по двочасовната консултативна средба со претседателот Иванов, на која присуствуваа и заменик претседателката на СДСМ, Радмила Шекеринска и секретарот Оливер Спасовски.
„Ни беше укажано дека како второпласирана партија не можеме да добиеме мандат, дека мора да доставиме, со потписи – доказ за бројот на обезбедени 61 пратеник. Јас сум оптимист дека е можно да формираме влада. Сега ќе разговараме во партијата, со оглед на новонастанатата ситуација“, изјави Заев по средбата.
Во вилата „Водно“ заврши и средбата на претседателот Иванов со лидерот на ВМРО-ДПМНЕ, Никола Груевски. Тој не даде изјава за медимуите.
Лидерот на ДУИ, Али Ахмети, пак, по средбата со Иванов рече дека „клучот за политичката криза“, го предал на претседателот Иванов.
„За да бидам посимболичен, ја имав бомбата, ја предадов на преседателот, каде ќе ја фрли, не знам“, изјави Ахмети.
Останува неизвесно што натаму ќе се случува и како ќе се одвива постапката за формирање влада.
Правните експерти во Македонија, се едногласни во изјавите за за ЦИВИЛ Медиа дека според Уставот, претседателот Иванов веднаш треба да го даде мандатот на СДСМ. Остварувањето консултативни средби била негова одлука во првите 10 дена, по официјално соопштување на изборните резултати. Според експертите е неприфатливо, Иванов сега да не го предаде мандатот на СДСМ, кога веќе започнал со оваа постапка и го дал на ВМРО-ДПМНЕ со освоени 51 мандат, или само два пратенички мандата повеќе.
Правните експерти посочуваат дека Иванов за ваквите постапки треба да понесе политичка, а некои велат и кривична одговорност.
Моника Талеска