На собири под мотото „Ние сме Македонија“ македонските иселеници во САД и во неколку други земји вчера и денеска протестираат против промена на уставното име на Македонија, јави дописникот на МИА од Вашингтон.
На собирот во центарот на Вашингтон денеска неколку организации и групи од Њу Џерси, Масачусетс,Њујорк и Вашингтон од македонската Влада побараа прекин на преговороте со Грција и заштита на македонскиот идентитет.
– Смислата на нашиот апел не е да критикуваме. Ние не сме против никого и не шириме шовинзам, туку се работи за одбрана на основните права. Нашите предци се избориле државата да се вика Македонија и со борба го сочувале името. Тие ни го предале тоа право и наша цел е да го зачуваме. Едноставно е, изјави Горан Митревски, еден од лидерите на движењето „Ние сме Македонија“.
На протетот се обратија и свештеникот Слобадан Петковски од православната црква „Св. Кирил и Методиј“ во Њу Џерси, лидерите на Обединета Македонска Дијаспора, Александар Митевски и Мето Колоски, како и лидерите на Организација за македонски човекови права во Северна Америка.
– Ова е првпат Македонци да се соберат во толкав голем број на Националната алеја (комплекс од разни музеи и споменици во историскиот центар на Вашингтон), и затоа ова е историски ден за Македонците во САД, изјави Колоски.
Според Александар Митревски Македонија се соочува со две големи неправди – промена на името, како услов за влез во НАТО и ЕУ, и поставување на дополнителен услов за влез во ОН, наспроти фактот што таа ги исполни критериумите од членот 4 од Повелбата на ОН.
Од движењето наведуваат дека и покрај фактот што 137 земји ја имаат признато Македонија под уставното име, сегашната влада преговара за негова промена во услови кога Грција поставува максималистички барања и го негира македонскиот идентитет и нација.
Од собирот се побара големите сили да се вмешат во преговорите. Решението да се бара со меѓународна спогодба помеѓу двете земји гарантирана од постојаните членови на Советот за безбедност.
– Единствен начин да се пресече оваа речиси тридецениска загатка е меѓународна спогодба на која Грција треба да истапи од своите максималистички барања и нашата земја да влезе во меѓународните инситуции под уставното име, тоа е – Република Македонија, изјави Митревски.
Слични собири денес и утре се одржуваа во неколку градови во Австралија и Нов Зеланд, потоа во Холандија, Англија, Италија, Чешка, Словенија и Малта.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
