НАТО или Северноатланската алијанса е меѓународна безбедносна организација со седиште во Брисел, Белгија и организацијата претставува систем за колективна одбрана со која членките се обврзуваат за заедничка одбрана во одговор за напад од надворешни лица.
Алијансата претставува политичко и воено здружување на 29 земји членки, од Европа и Северна Америка. Македонија во 2009 година требало да стане земја членка на НАТО, но поради недоразбирање со Грција околу уставното име, таа го блокирала пристапот на Букурешкиот самит.
Девет години подоцна, по донесениот договор со Грција и потпишувањето на истиот од страна на владите на двете држави, пристапните разговори за членство на Македонија во НАТО ќе почнат на 12 јули, со испорака на поканата. На Самитот на 12 јули, ќе има церемонија за врачувањето на поканата кон Македонија.
Се очекува пристапниот протокол да биде потпишан во јануари 2019, откако ќе заврши имплементација на македонските обврски од договорот со Грција. Македонија ќе учествува во сите структури на НАТО и добива столче на главната маса на Северноатлантскиот совет.
Потребни се околу една до една и пол година за ратификацијата на договорот за пристапување во парламентите на сите земји членки на НАТО.
Генералниот секретар на НАТО, Јанс Столтенберг изјави дека е сигурен дека шефовите на државите и владите ќе ја поканат Македонија да започне пристапни преговори, а потоа неколку месеци ќе има престапни преговории и доколку внатрешните процеси се финализирани во земјата, тогаш ќе може Македонија да се приклучи кон НАТО.
Тој како пример го додаде членството на Црна Гора, чии преговори биле издадени во декември 2015, а биле финализирани во март 2016, а потоа сите 28 земји членки го ратификувале Протоколот до јуни 2017 година.
„Она што одзема време е всушност ратификацијата во разните земји членки“, појасни првиот човек на НАТО.
ЦИВИЛ во февруари годинава, организираше панел дискусија насловена „Членството на Република Македонија во НАТО: Задачи, предизвици и можности“, како придонес кон јавната дискусија, на која учествуваа министерката за одбрана Радмила Шекеринска, Амбасадорката на Република Хрватска, Данијела Баришиќ, Националниот координатор за НАТО, Стево Пендаровски и политичкиот аналитичар, д-р Сашо Орданоски.
„Анализите на јавното мислење покажуваат дека граѓаните на Македонија немаат многу информации што точно значи НАТО. Тие интиутивно го имаат својот став за членството на Македонија во НАТО. Дел од тие впечатоци се базираат на бројки“, истакна министерката за одбрана, Радмила Шекеринска.
Амбасадорката на Република Хрватска, Данијела Баришиќ, истакна дека процесот на нашето прилагодување е еднакво важен колку и самото членство, и дека важно законот да се однесува на сите.
„Ние во тој процес на прилагодување кон ЕУ и НАТО гледавме начин како да ги зајакнеме нашите државни институции, беше многу важно законот да се однесува еднакво на сите, а не за едни да важи во позитивна смисла, а другите да не се во толку добра положба. Ние на тој начин го третиравме членството во ЕУ и НАТО“, изјави Баришиќ.
„Ако земеме во предвид дека до скоро време процентот на поддршка беше 92-98 проценти, тоа значи дека граѓанките и граѓаните не се запознаени. Во последните години процентот е драстично опаднат. Нема повисок процент на поддршка во светот од Македонија, а тоа значи дека на луѓето им се пласираат лоши и неточни информации. Претходната власт правеше хистерична кампања против Алијансата“, истакна Стево Пендаровски.
Преку аналогија на односите меѓу Германија и Франција, Сашо Орданоски ја истакна потребата од решавање на односите меѓу Македонија и Грција, како еден од условите за членство во НАТО и ЕУ.
Орданоски излезе со предлог до македонската влада да се обидат со Грците во Солун да отворат канцеларија за соработка на млади. „Таквата канцеларија меѓу Франција и Германија постигна фантастични успеси“, вели Орданоски.
Денот на НАТО, 4 април, беше одбележан во Воениот музеј, со трибината „НАТО и Ти“, која беше организирана од Министерството за одбрана, во координација со АТА Македонија, НАТО Канцеларијата за врски во Скопје и Амбасадата на Хрватска во Македонија.
На трибината учествуваа министерката за одбрана Радмила Шекеринска, министерот за финансии Драган Тевдовски, амбасадорот на САД, Џес Бејли, хрватската амбасадорка Данијела Баришиќ и шефот на Канцеларијата за врски на НАТО во Скопје, морнаричкиот капетан Горазд Бартол.
Американскиот амбасадор, Џес Бејли, тогаш изјави дека во споредба со минатото, најголемата разлика е дека Македонија може наскоро да влезе во НАТО.
„Што значи членството во НАТО за Македонија и нејзините граѓани? Тоа значи дека ќе бидете сојузници, а не партнери, соседи со останатите членки. Алијансата е сојуз што се заснова на почитување на човековите права и слободи, демократијата и владеењето на правото“, додаде Бејли.
Ангела Петровска
