Со посетата на членовите на Комитетот за интеграција во НАТО и на Работниот комитет за интерација на седиштето на Алијансата во Брисел денеска и утре почнуваат претпристапните разговори за членство на Македонија во најголемиот воено-политички сојуз во светот.
Македонија на Самитот на НАТО во Брисел во јули и официјално доби покана за членство, но влезот е условен со имплементација на Договорот од Преспа.
Со оваа сесија разговори во Брисел, Македонија де факто ја отвора последната фаза во односите со НАТО пред членството во Алијансата.
Артан Груби, на денешната прес-конференција изјави дека е убеден дека на крајот разумот ќе победи и дека ќе има двотретинско мнозинство за прифаќање на уставните измени.
Денеска во Собранието нема расправа за уставните измени. Таа е закажана за утре, но неколку пратеници од владејачката коалиција денеска се огласија преку прес-конференции од Собранието.
Томислав Тунтев изјави дека пратениците имаат одговорност пред граѓаните и треба да ја почитуваат нивната одлука изразена на референдумот, така што Собранието ќе ги усвои измените. Според него, тоа е пакт што мора да биде изоден заедно со власта и опозицијата.
„Алтернатива не постои, секој друг предлог е туркање во изолација. Македонија му припаѓа на западно-европскиот свет без разлика што Христијан Мицкоски има проблем со тоа“, додаде Тунтев.
Откако пратениците од ВМРО-ДПМНЕ и коалицијата „За подобра Македонија“ соопштија дека се откажуваат од дебатата, велејќи дека е јалова, како и дека ќе гласаат против уставните измени, претседателот на Собранието, Талат Џафери, рече дека расправата ќе продолжи во петок.
На вчерашната седница на која зборуваа само пратениците од коалицијата на власт, се повтори ставот дека сега е време сите што декларативно се залагаат за НАТО и ЕУ да дадат конкретна поддршка на уставните измени.
САД ги поттикнуваат лидерите во македонското Собрание да ги надминат партиските политики и да ја искористат историската можност за подобра иднина на земјата, вели ,меѓу другото, претставник од Стејт департментот во изјава за грчката новинска агенција АНА- МПА.
САД цврсто ја поддржуваат целосната имплементација на договорот, кој ќе и овозможи на Македонија да го заземе своето место во НАТО и ЕУ како Република Северна Македонија, придонесувајќи за регионална стабилност, безбедност и просперитет. Бидејќи во македонското Собрание продолжува расправата за уставните измени ги поттикнуваме лидерите да ги надминат партиските политики и да ја искористи оваа историска можност за да се обезбедат подобра иднина за земјата како полноправна членка на западните институции, рекол претставникот на Стејт департментот за грчката новинска агенција АНА-МПА.
Телефонски разговор по оставката на Никос Коѕијас имале премиерите на Македонија и на Грција, Зоран Заев и Алексис Ципрас.
Според портпаролот на грчката Влада и министер без ресор, Димитрис Ѕанакопулос, и двајцата премиери се согласиле и повториле дека работат на имплементација на Договорот од Преспа.
Ангела Петровска
