Даниела Рангелова е една од најмаркантните жени во македонската политика. Некогаш блиската соработничка на поранешниот премиер Никола Груевски, за себе вели дека никогаш не отстапила од сопствените ставови. Во јавноста е позната како и како лидерка на Унијата на жените при ВМРО-ДПМНЕ. Како пратеничка од редовите на ВМРО-ДПМНЕ, Рангелова беше претседателка на Комисијата за еднакви можности на жените и мажите во македонскиот парламент, како и на низа други собраниски тела и комисии. Во текот на нејзината долга политичка кариера, поради директниот и критички настап за клучни прашања во општеството и политиката, често била и е мета на говорот на омразата од различни страни, вклучително и од нејзината партија.
ЦИВИЛ МЕДИА: Да почнеме со актуелните состојби на политичка партија во која сте ветеран, и каде што голем дел од својот живот го посветивте на активности, на развој, особено во доменот на работата на Унијата на жените. Какви се состојбите во ВМРО-ДПМНЕ? Сега имате ново водство, имавте еден кандидат, но со максимален број гласови кои ги освои г. Мицкоски на Конгресот.
РАНГЕЛОВА: Состојбата е навидум така како што изгледа и во јавноста, Христијан Мицкоски си го потврди својот втор мандат како претседател на ВМРО-ДПМНЕ. Имаше избрано делегати, негови блиски луѓе, и тоа го очекувавме. Тука е само сменета ситуацијата, бидејќи, реално, ВМРО-ДПМНЕ победи на овие локални избори. Не се најде некој да се охрабри, да се пријави уште еден противкандидат на Христијан Мицкоски, заради тоа што, за жал, не само во ВМРО-ДПМНЕ, туку во сите политички партии, најмногу влијае клиентелизмот. Кога членовите ќе видат дека веќе се освоила победа на некои избори, тогаш не сакаат да се одвојат од главното јадро, од центарот, од оската, а тоа е најчесто претседателот и раководството. Затоа, сите едногласно му дадоа поддршка.
ЦИВИЛ МЕДИА: Минатата година, повеќе луѓе му се спротивставија на г. Мицкоски. Се повикуваше на вонреден конгрес, се направија неколку обиди за демократизација на ВМРО-ДПМНЕ, да се избегне ситуацијата во која делегатите се всушност назначени од лидерот, во една повратна спрега на клиентелизам, како што спомнавте. До каде е таа работа, очигледно ништо не се направи со тоа?
РАНГЕЛОВА: Видете, мислам дека вистински обид за смена на Христијан Мицкоски не беше направен. Беше организирана иницијатива од таканаречената „Мериот коалиција“. Мене ми е безобразно тоа да го кажам, бидејќи дел од тие луѓе што беа во таа иницијатива, се и мои колеги и колешки, и јас почитувам што се охрабрија.
Јас не се приклучив кон таа коалиција, бидејќи мислам дека таа коалиција од сам старт е осудена на неуспех. Според мене, лидер не се менува на тој начин, и не се менува од иницијатива на луѓе коишто го назначија Христијан Мицкоски да биде лидер на партијата. Кога треба да се смени некој лидер, тоа треба да го сакате навистина, а не да критикувате во јавноста, за да добиете ваша добра позиција во рамки на партијата. Најчесто и луѓето што критикуваат, зборувам за дел од нив, не веруваат дека ќе дојде до смена на Христијан Мицкоски. За жал, малкумина се охрабрија.
Јас имав друга идеја, мислев дека членството е тоа што треба да ја покрене иницијативата за смена на Христијан Мицкоски. Но работите се менуваат. Тој по неколку порази, не сакаше да понесе одговорност. Според мене, кога губи треба да си оди, а кога ќе победи, треба да остане. Тој одеше на долг рок – кога и да е, еднаш СДСМ ќе изгуби, што реално и се случи.
Инаку, сметам дека не го изместија воопшто од позициите во партијата, заради тоа што, пак ќе кажам, клиентелизмот е многу голем во партијата. Го критикуваат, но зад грб, и најчесто, кога ќе им се обратите со прашањето дали се согласуваат со сегашните политики на ВМРО-ДПМНЕ, велат: „не, но немам нерви и желудник да излезам во јавност и да кажам, бидејќи ќе бидам осуден од членството, ќе бидам масакриран на социјалните мрежи“.
Не секој може да го издржи тоа, јас знам дека за некои луѓе тоа е многу тешко. На пример, јас сум имунизирана од такви „дејствија“. Таков однос кон мене имале и СДСМ кога биле во опозиција, и сега ВМРО-ДПМНЕ, но жал ми е што многу луѓе што ги знам и кои се квалитетни и кои би се охрабриле да се приклучат во политиката, не се вклучуваат баш заради таквите состојби во нашата држава.
ЦИВИЛ МЕДИА: Кој владее во ВМРО-ДПМНЕ, Груевски, или Мицкоски? Или заедно?
РАНГЕЛОВА: Христијан Мицкоски е претседател на партијата. Очигледно е дека влијаат повеќе струи, јас не би персонализирала, туку мене ме интересира кои надворешни политички сили влијаат врз нашата политичка партија, што е за мене клучно прашање.
Тоа е и мојот главен проблем во несогласувањето со раководството на ВМРО-ДПМНЕ. Мислам дека Груевски има влијание, секако, бидејќи долго време, кога бил претседател, 12 години, долго време беше и премиер. На многу луѓе и лично им помогнал, и имало периоди кога водел и добри политики, мислам дека неговата грешка беше во односот со меѓународната политика и можеби дел со јавноста, со медиумите, но долгото владеење го прави тоа.
Истото мислам дека се случува и во СДСМ. Во изминатиот период, кога некој веќе ќе се раскомоти на столицата, на владејачкото место, се раскомотува и не ги ни слуша критиките.
Јас тука би кажала и една мисла од Марк Твен, дека повеќе треба да ги слушаме граѓаните, отколку што ќе зборуваме, и да не шириме празни флоскули и зборови, бидејќи, ако беше обратно, ќе бевме родени со две усти, наместо со две уши. За жал, општеството налага нешто друго, повеќе ветувања, празни ветувања, креирање очекувања, а мала реализација.
ЦИВИЛ МЕДИА: Навистина, демократската димензија на политичките партии е проблематична, со исклучок на тоа што видовме одредени новини во СДСМ, со општи избори од целото членство. Што се однесува до ВМРО-ДПМНЕ, дали лидерот е во таква ситуација да може да прави што ака во партијата, да раководи со финансиите на партијата? Знаеме за еден случај и против претходникот на г. Мицкоски, г. Груевски. Дали и на кој начин, ако му се спротивставите, претседателот или лидерството на партијата има механизми да се одмазди? Еве спомнавте „спружување“ на социјалните мрежи…
РАНГЕЛОВА: Во однос на финансирањето, тука не би го издвоила ВМРО-ДПМНЕ, бидејќи мислам дека подеднакво сите политички партии се финансираат на ист начин. А тоа е донесениот Закон за финансирање политички партии, но ме загрижува тоа што ниту една политичка партија не дава транспарентна отчетност каде ги троши парите. А навистина се работи на сериозна сума пари.
Секоја партија, на пример, и ВМРО-ДПМНЕ и СДСМ, добиваат околу милион и осумстотини илјади евра, а тоа е сериозна сума пари. Јас мислам, бидејќи сум водела организација, дека нема потреба од толку голема сума да имаат политичките партии. Од друга страна, и кога се опозиција, а добиваат толку финансиски средства, не им се напушта таа позиција, бидејќи навистина се удобно сместени во нивните седишта, и располагаат со средства кои и да бидат долго време во опозиција, не би им пречело.
Во однос на тоа дали тие би ги масакрирале луѓето коишто говорат, тоа е евидентно! И во која било политичка пратија. Социјалните мрежи станаа место на кое луѓето се пресметуваат помеѓу себе, каде што некој може да искаже зборови, а тој што е нападнат, не може да до докаже спротивното.
За жал, од толку сајбер булинг, нема одговор од ниедна институција. И тоа е најголемиот проблем и предизвик на нашето општество, не заради политичарите, туку заради иднината на нашите млади генерации. Бидејќи, освен што се случува тоа на политичко поле, многу деца се изложени, тинејџерки и тинејџери се изложени на сајбер булинг. Никој не реагира.
Еве, во соседна Србија, се случи една инфлуенсерка да си го одземе животот заради сајбер булинг. Мислам дека тоа е еден предизвик со којшто треба да се занимава државава, и власта, и опозицијата, бидејќи навистина може да ја наруши психата на младата генерација. Политичарите, и оние што решиле да критикуваат, веќе се имунизирани, и претежно го очекуваат тоа, и не им е ништо ново.
Мене, на пример, не можат со ништо да ме поместат, заради тоа што јас сум кажала дека гласно ќе критикувам. Може да ме исклучат од политичката партија, но подобро е да ги кажам моите ставови, коишто на долг рок се константни, и така ќе ги задржам, отколку да бидам клиентелист, да побегнам од самата јас за некоја политичка функција.
Кога ја дадов оставката од партијата, си ветив дека никогаш повеќе нема да се однесувам како што некој друг ќе ми наложи. Нормално, треба да се почитува програмата и идеологијата на која си припаѓал. Кога стануваш член, знаеш која е идеологијата и политичката програма, но сепак треба да има демократија, бидејќи ние сме различни индивидуи, различно се изразуваме, различно мислиме, и тоа е всушност убавината на едно општество и на едно политичко делување – различни мисли да донесат до една иста цел која што ќе биде во интерес на граѓаните на државата.
Разговараше: Џабир Дерала
Камера: Атанас Петровски
Монтажа: Ариан Мехмети
Обработка на текст: Дијана Тахири
Фотографија: Горан Наумовски
Сите права се задржани.
