Во контекст на континуираните заложби и напори да се откријат и разобличат дезинформациите и говорот на омразата во јавната комуникација, и да потсети на потребата од соработка и меѓусебна поддршка меѓу медиумите и граѓанските организации, редакцијата го извлече од својата богата архива прилогот на Слободен печат, објавен на денешен ден, пред три години (6 август 2020). Текстот од Слободен печат го пренесуваме во целост:
„Денеска во просториите на редакцијата на „Слободен печат“ невладината организација Цивил одржа тематски брифинг за новинарите, на кој се зборуваше за борбата против лажните вести и говорот на омраза во период по завршувањето на предвремените парламентарни избори во земјава кои се одржаа на 15 јули“, пишува Слободен печат, а делови пренесе ЦИВИЛ Медиа.
Во текот на денешниот настан свое обраќање имаше и основачот и раководител на Цивил Медиа, Џабир Дерала, како и Дехран Муратов и Билјана Јордановска.
Главна тема на дискусијата беше борбата против лажните вести и дезинформациите кои се шират на социјалните мрежи, како и чекорите кои оваа организација ги презема во врска со тоа, а како основни проблеми со кои се соочуваат се посочени неколку точки, како злоупотреба на моќ, лажни вести и дезинформации, говор на омраза, пропаганда, странско влијание и сајбер војна во време на избори.
Токму Цивил Медиа како акредитиран набљудувач го следеше и овој изборен процес, а како што истакна и Џабир Дерала, изборите за оваа организација всушност се уште не се завршени.
– Како акредитирани набљудувачи на изборите, за нас тие завршуваат најмалку шест недели по изборниот ден. Наша задача е да ги анализираме сите извештаи кои стигнуваат во текот на изборниот процес, вклучувајќи го и периодот од предизборната кампања. На самиот ден на изборите имавме рекордна ниска бројка на пријави, што е добар знак, но тоа сепак е трицифрена бројка од 430 пријави – истакна Џабир Дерала.
Од она што можевме да го слушнеме во врска со борбата против лажните вести е дека токму по иницијатива на Цивил, веќе неколку Фејсбук страници кои ширеле дезинформации за изборите, се блокирани или избришани.
Покрај константната борба против шиењето на неточни информации и дезинформации, членовите на Цивил го истакнаа значењето на почитувањето на Европските вредности, како и иницијативата за создавање на „Зелено движење на Македонија“, како движење кое би функционирало на начин на кој тоа треба да изгледа според сите европски рамки и стандарди.