Дирекцијата за заштита на лични податоци (ДЗЛП) е домаќин на тридневен состанок на Регионалната иницијатива 20i7 на кој учествуваат претставници на органите за заштита на личните податоци од Словенија, Хрватска, БиХ, Србија, Црна Гора и Македонија.
Како што информираат од ДЗЛП, тема на состанокот е општата Регулатива за заштита на личните податоци на Европската унија во земјите од Унијата и надвор од неа. Претставниците на земјите од регионот ќе дискутираат и ќе разменуваат искуства за подготовките за примена на Регулативата која стапува на сила на 25 мај оваа година.
Идејата е, како што посочуваат од Дирекцијата, за размена на меѓународни искуства во област на заштитата на лични податоци бидејќи обработката на личните податоци во 21 век не познава граници. Прашањето е глобално и бара глобални и заеднички одговори за сите потенцијални закани од евентуални злоупотреби на личните податоци.
Минатата година регионален состанок на претставници на телата заштита на личните податоци се одржа во Словенија, а утре ќе се знае каде ќе се одржи следната година.
Во Извештајот на ЕК, што беше објавен минатата недела, Македонија е позитивно оценета во делот на заштитата на лични податоци и се признава прогресот на Дирекцијата, но исто така се препорачува донесување нов закон за заштита на лични податоци со кој ќе се имплементира Регулативата.
Како што информираат за МИА од ДЗЛП работниот текст на законот е веќе завршен и за него е добиено мислење од ЕК. Наскоро текстот на законот ќе биде испратен до Министерството за правда и до Владата за негово донесување.
Извор: МИА