Рускиот ултранационалист Игор Гиркин се пожали дека фокусот на Русија на заземањето на Бахмут е „стратешки неуспех“ што резултираше со „непотребна и пирова“ победа, објави во својот извештај од вторникот Институт за проучување на војната (ISW) со седиште во Вашингтон.
Гиркин ги критикуваше шефот на групата Вагнер, Евгениј Пригожин, министерот за одбрана Сергеј Шојгу и началникот на Генералштабот Валериј Герасимов за продолжување на обидите за заземање на Бахмут и за одвлекување од подготовките за одбрана од претстојната украинска контраофанзива.
„Хиперфокусот на тврдењето победа во Бахмут го одвлекува вниманието од несигурната руска воена ситуација во и околу Бахмут, нагласувајќи ја тежината на влијанието на Пригожин во информацискиот простор“, се вели во извештајот.
Ова не е прв пат Гиркин да упати критики кон „Вагнер“ и неговата улога врз настаните на бојното поле, кое, според него, всушност, било прилично мало, затоа што битката што ја водат за релативно мал град во Донбас, мислејќи на Бахмут, не е толку важна воено.
Освен тоа што не е одлучувачки за текот на војната, доведува до огромни загуби на борци, сето тоа, ѝ дава време на Украина, изјави неодамна Гиркин.
Рускиот воен блогер и поранешниот член на ФБС Игор Гиркин (Стрелков) , кој ги предводеше проруските сили во Донбас од 2014 година, е и еден од главните протагонисти во раздорот помеѓу воените власти во Кремљ и водачот на парамилитантната група Вагнер, Евгениј Пригожин.Тој не штеди зборови во критиките упатени кон Пригожин, кого го опишува како психички нестабилна личност и воен злосторник, но мета на неговите критики е и руското воено раководство, а во своите несогласувања со начинот на водењето на војната во Украина, не го заобиколува ниту Путин.
Гиркин пред неколку месеци беше осуден за соборување на летот „МХ17“ во 2014 година.
Драган Мишев
