Претседателот на Владата на Република Македонија, Зоран Заев, денеска се сретна со Јан Петерсен, шеф на набљудувачката мисија на ОБСЕ/ОДИХР за претстојниот референдум во Република Македонија. На средбата, било разговарано за важноста за демократско спроведување на процесот и за потребата од висока одговорност од страна на сите субјекти во државата, за да се осигура изјаснувањето на граѓаните соопшти Секторот за односи со јавност на Владата на Република Македонија.
Од денеска официјално почнува кампањата за претстојниот референдум на кој граѓаните на 30 септември треба да се изјаснат дали се за членство во ЕУ и НАТО со прифаќање на договорот меѓу Македонија и Грција. Носител на кампањата е Собранието на Република Македонија, а претседателот на Парламентот Талат Џафери во петокот најави дека ќе ја водат кампањата транспарентно, непосредно и директно, без дискриминација, предрасуди и со почитување на волјата на секој граѓанин.
Формиран е Заеднички интердисциплинарен комитет на експерти (ЗИКЕ) за историски, археолошки и образовни прашања меѓу Македонија и Грција. Во составот на ЗИКЕ од македонска страна има седум члена, на чело со амбасадорот Виктор Габер.
Портпаролката на Европската Комисија, Маја Коцијанчич, од Брисел порача дека очекува граѓаните во Македонија да гласаат на референдумот без надворешни мешања, јави дописничката на МИА од Брисел.
Академикот Владо Камбовски на денешната прес-конференција, запрашан за неговата неодамнешна изјава за оние кои ќе бојкотираат на референдумот, рече дека недозволиво е граѓани да одат од врата на врата и да им се закануваат на други граѓани да не излезат на референдумот на 30 септември.
Остварување на неприкосновеното право на глас на граѓанките и граѓаните е главната цел на новиот проект „Гласам, значи постојам“ што ЦИВИЛ – Центар за слобода, утре (вторник, 11 септември) ќе го промовира во повеќе општини од Вардарскиот регион.
Граѓанките и граѓаните на општините Велес, Градско, Росоман, Кавадарци и Неготино на инфо-штандовите на ЦИВИЛ ќе имаат можност да се информираат и да ги споделат своите ставови, мислења и информации во врска со претстојниот референдум со претставниците на огранизацијата и да ги остават своите пораки на паноата поставени на плоштадите во овие општини или анонимно ја остават својата порака во „кутија за гласање“. Исто така, тие ќе можат слободно да го искажат своето мислење и пред камерата на екипата на ЦИВИЛ МЕДИА (организациска единица на ЦИВИЛ).
А. Петровска
