ЏАБИР ДЕРАЛА
Нашите читателки и читатели забележаа дека медиумската платформа на Цивил беше бавна и на моменти недостапна текот на денот недела, 30 јануари 2022. Добивме повеќе пораки во текот на претпладневните часови дека ЦивилМедиа, Дрејт и ЦивилТудеј, како и Фронтлајн.мк и некои други интернет платформи, одвај се отвораат или едноставно се недостапни.
Не бевме во можност да одговориме порано, но сега можеме да потврдиме и да одговориме на некои од прашањата во нашиот инбокс. Да, точно е, се работи за зголемен интерес за нашите содржини, но тоа ни оддалеку не е причината за тешкотиите со кои се соочи нашата медиумска платформа.
Според информациите што ги добивме од експертите за сајбер безбедност со кои соработуваме и со кои денеска бевме во интензивна комуникација, нашите медиумски прилози го привлекле и „читателското“ внимание на помалку пријателски настроени ентитети.
А кога тие „читаат“ тоа го прават „малку“ поинаку.
За жал, имам обврска, заради нашето „сајбер здравје“, да го следам советот на нашите сајбер безбедњаци и да не откривам повеќе детали за видот на „читањето“ што денеска ни го приредија тие „ентитети“. Иако, ако сега му пристапите на некој од нашите интернет портали, повеќето од вас ќе бидат кратко задржани на „контролниот пункт“ на Cloudflare, но по две-три секунди ќе продолжат со своето патување низ нашиот медиумски простор.
Во секој случај, медиумските платформи што беа цел на вниманието на оние што „читаат до корен“ не паднаа во ниту еден момент за време на „читањето“.
Тоа што можам да го споделам е дека „читањето“ било толку жестоко што, да беше заштитата послаба, од нашите интернет портали немаше да остане ниту буква. Некој ми напиша денеска: „Изгледа сте погодиле таму каде што боли. Многу ли беше јако?“ Потврдив, но бев горд, по не знам кој пат сите овие години, на нашите сајбер витези.
Им благодарам на вредните сајбер витези, тие ангели-чувари на нашата и вашата слободна зона. За нив не постои работно време, бидејќи деноноќно се вклучени во нашата заштита. Се разбира, благодарност и за нашата бројна публика за трпението, разбирањето и поддршката.
Продолжуваме понатаму, „да болиме“ секаде каде што тоа е потребно. Им благодариме и на оние што го нарачаа овој тест на издржливоста.
Сите права се задржани.
