Премиерот на Република Македонија, Зоран Заев и премиерот на Република Бугарија, Бојко Борисов денеска во Скопје го потпишаа Договорот за пријателство, добрососедство и соработка. Според премиерот Заев, овој Договор претставува историски чекор за Македонија. Тој го повика опозициониот лидер, Никола Груевски и ВМРО-ДПМНЕ, да дадат поддршка на Договорот.
„Потпишувањето на Договорот за добрососедство, пријателство и соработка меѓу Република Македонија и Република Бугарија покажува дека таму каде што има политичка волја и идеја за прогрес, прашањата ќе се решат. Република Македонија и Република Бугарија направија историски чекор напред, заедно го поставивме минатото како темел на иднината, со тоа отворивме пат за стабилност и развој за двете држави, и за балканскиот регион. Затворивме прашање со кое го трасиравме патот на пријателството, добрососедството и соработката меѓу нашите две земји. Овој Договор е взаемен успех, но и придонес кон стабилизација и во државите и на регионот на којшто припаѓаме. Овој успех нека биде идеја, модел, пример за соработка за регионот и пошироко. Владата се одлучи да води политики на решенија, а не на проблеми. Во Владата на Република Бугарија видовме конструктивен партнер со исти цели. Ова наше пријателство е пример како долгогодишна кочница може да се претвори во мотор за соработка и поврзување на народите. Договорот обезбедува отворени шанси за економски развој и во сите други области значајни за квалитетот на животот на народите во двете држави“, порача премиерот Заев, по потпишување на Договорот.
Премиерот на Бугарија, Бојко Борисов рече дека е потпишан договор со убаво име, а ја истакна и важноста на двата меморандума, за железничка инфраструктура и природен гас, што беа потпишани меѓу претставниците на ресорните министерсва од двете држави.
„Овој Договор има смисла. Ќе ја видите сега реакцијата на Европската унија, ќе биде соодветна. Меѓу две држави, без модератори, без посредници, без некои упатства, дојдовме до одлука за која, мирот, пријателството и добрососедството е поважно од сè останато. Решивме да гледаме напред и убеден сум дека за 10 години, резултатите ќе бидат видливи за двете држави. И утре на тој ден, на Илинденското востание ќе бидеме заедно. Зашто, терминот заедничка историја е термин којшто обединува и дава перспективи, а не разделува“, рече бугарскиот премиер Борисов.
Високата бугарска делегација денеска напладне беше пречекана на платото пред Владата на Република Македонија со официјална церемонија, со интонирање на државните химни на двете држави, со рапорт на командантот на почесната воена гардиска единица, поздрав на знамето на Република Македонија, обиколка на почесната воена гардиска единица и со поздрав од бугарскиот премиер, Борисов.
Бугарската делегација попладнево ќе се сретне со претседателот на македонското Собрание, Талат Џафери и со претседателот на државата, Ѓорге Иванов.
Првата средба на двата премиера Заев и Борисов, се одржа во Софија на 20 јуни.
Моника Талеска
Камера: Дехран Муратов
