ЦИВИЛ – Центар за слобода ќе го набљудува прегласувањето за градоначалник на општина Чаир на избирачкото место 2901, кое ќе се одржи на 12 ноември (недела).
Мониторинг тимовите на ЦИВИЛ и по завршувањето на вториот круг од локалните избори се постојано на терен и ја набљудуваат состојбата пред прегласувањето в недела. ЦИВИЛ е во постојана комуникација со набљудувачите, граѓанските новинари, волонтерите и граѓанките и граѓаните од општина Чаир.
Неколку месеци пред распишувањето на локалните избори, ЦИВИЛ започна со мониторинг на општините низ целата земја, ги следеше состојбите на терен и собираше информации од своите соработници за текот на подготовките за изборите, како и за двата круга од изборниот процес. Дел од овие информации се веќе објавени на медиумската платформа ЦИВИЛ Медиа, како и на веб-страниците на албански и англиски јазик, а дел од нив за прв пат ќе бидат објавени во финалниот извештај на ЦИВИЛ по завршувањето на изборниот процес.
Огромен број материјали и содржини од терен пристигнуваа во текот на предизборниот период, на двата изборни дена. Информации од терен стигнуваат и овие денови пред прегласувањето во избирачкото место 2901.
Објавувањето и расветлувањето на сите аспекти на изборните процеси во земјата ќе продолжи и понатаму, преку одличната соработка со набљудувачите, дописниците, граѓанските новинарки и новинари и волонтерите на ЦИВИЛ.
Ги повикуваме граѓанките и граѓаните, медиумите и сите засегнати страни кои имаат информации за изборни нерегуларности да ги пријават на телефонските броеви 02 / 5209 176, 071 608 523, 078 / 746 138 и онлајн формуларот www.slobodniizbori.info.
ЦИВИЛ – Центар за слобода има нулта толеранција кон изборните нерегуларности и ги повикува сите учесници во прегласувањето на избирачкото место 2901, на 12 ноември, да придонесат за мирен, слободан и демократски изборен ден.
