ВЕСТ НА ДЕНОТ
Започна Самитот Западен Балкан во Тирана
Во Тирана денеска се одржува Самитот за Западен Балкан – Европска Унија на кој ќе се разговара за миграцијата, како и за соработката и за последиците од војната во Украина, вклучително и санкциите на ЕУ кон Русија и интеграцијата на регионот во внатрешниот пазар на ЕУ, на пример, со намалување на таксите за роаминг на мобилни телефони.
Европска комисија вчера побара засилување на граничните проверки во регионот, депортирање и воведување на визи за државјаните кои доаѓаат од земји кои не се членки на ЕУ.
Северна Македонија, Србија, Босна и Херцеговина, Косово, Албанија и Црна Гора имаат аспирации за влез во ЕУ. Пристапните преговори со Северна Македонија и Албанија официјално почнаа во јули, откако првпат аплицираа во 2004 односно во 2009 година, а Босна и Херцеговина во 2016 година.
ИЗЈАВА НА ДЕНОТ
Вархеји: Партнерството е тоа што му го нудиме за Западен Балкан
„Партнерство, тоа е тоа што го нудиме и тоа е причината што овој самит се одржува за првпат на Западен Балкан“, изјави кусо за медиумите еврокомесарот проширување и добрососедство, Оливер Вархеји денеска во Тирана.
ФЛЕШ ВЕСТИ
СЛУЧАЈ ОНИШЧЕНКО Владата на Република Северна Македонија на денешната седница одлучи да се поништи одлуката за прием на Олександр Онишченко во државјанство на Република Северна Македонија.
АНТИКОРУПЦИЈА Тим за санкции од Вашингтон пристигна во земјава за да изврши поагресивен увид во поранешните и сегашните корумпирани актери, и да ги разгледа сите можни одговори, објави денеска на Твитер американската амбасадорка во Северна Македонија Анџела Агелер.
РОАМИНГ Од 2023 година се намалуваат трошоците за роаминг помеѓу ЕУ и Западен Балкан, за потоа и целосно да се отстранат, изјави вицепремиерот Бојан Маричиќ денеска на Самитот во Тирана.
ЈАВЕН ПРЕВОЗ Град Скопје утре ќе објави повик за приватен превозник на автобуските линии 20 и 22, соопштија попладнево од кабинетот на градоначалничката Арсовска.
АНАЛИЗИ
„Една од целите на овој самит е и усогласување на заедничката надворешна и безбедносна политика како и заедничката борба против руската машинерија за дезинформации како главно оружје на Кремљ за зголемување на неговото влијание на Балканот.“, извадок од анализата „ Тирана- Самит за нова надеж во европските интеграции“, од Борјан Јовановски.
AL – PRESS
Албански медиуми: Бериша свика протести на денот на Самитот на ЕУ во Тирана, 24 часа Европска престолнина, зошто Ватикан не го признава Косово?
СЛОБОДНА ЗОНА
„Последнава недела некако се зголеми употребата на зборот мандат. Не само што се зголеми неговата фреквенција, туку и доби некое друго значење кое е својствено на нашата употреба на зборовите и поимите. Во суштина тој на латински значи – „дадено од рака“.“, Војо Маневски во колумната „Мерка – Мандат“.
„Дека станува збор за политичка игра говори и фактот што од блокадите и протестите на автобуските приватни превозници никој не е засегнат, освен граѓаните.
Имено, градоначалничката против која превозниците се бунат, не е блокирана. Не е блокиран ниту ЈСП, а со тоа ниту долгот.
Блокирани се скопјани.“, извадок од коментарот „Градот е во хаос, а скопјани мува не ги лази“ од Љубиша Николовски.
Потоа, запрашајте се: Како таа вест ве направила да се чувствувате? Дали ве поттикна да размислувате за преземање на одредена акција?“, Линда Балета во колумната „Новинарство и граѓанско општество: Сојузници во борбата против пропагандата“.
Д. Тахири