ВЕСТ НА ДЕНОТ
Валбон Лимани од коалицијата ВЛЕН денеска на прес-конференција го презентираше решението на Управниот суд со кое се прифаќа жалбата на коалицијата ВЛЕН за полнење кутии во Липково.
„Управниот суд ја прифати жалбата на Коалицијата ВЛЕН за гласачко место во Липково, каде што имало полнење на кутија од страна на блиски луѓе на носителот на листа на ДУИ во оваа зона, со техника позната како „бугарски воз”. Во судската одлука стои дека тужбата на кандидатот на претседателските избори во 2024 година, Арбен Таравари, е прифатена”, рече Лимани.
ИЗЈАВА НА ДЕНОТ
„Прво, тој што не може да формира влада значи изгубил на изборите бидејќи влада се формира со минимум 61 пратеник. Ќе видиме како ќе бидат финалните резултати на 8 мај, бидејќи изборите уште не се завршени и тогаш ќе може да се разговара во однос на формирање на влада. Јас знам како изгледа формирање на влада, треба да имате 61 пратеник минимум за да формирате влада. Полека, па ние сме во избори конкуренти со ВМРО-ДПМНЕ, 8 мај нека дојде па ќе видиме“, изјави претседателот на СДСМ, Димитар Ковачевски.
ФЛЕШ ВЕСТИ
ПРОТЕСТ „Нема правда нема мир“, „Стоп за насилството“, „Бараме заштита“… извикуваа претставниците од Фондацијата „Ромите за демократија“ на маршот кој почна пред ДИК, а заврши пред МВР во Скопје, при што побараа поголема заштита и зајакнување на полициската присутност за време на претседателските и парламентарните избори на 8 мај, посочувајќи дека нивните набљудувачи во Струмица се соочиле со одредени закани и обиди за физичко насилство, за време на првиот круг од претседателските избори што се одржаа на 24 април.
ЧОВЕКОВИ ПРАВА Работната група на Универзалниот периодичен преглед (УПП) на Советот за човекови права на Обединетите нации (ОН), денеска на состанок во Женева ќе ги разгледува по четврти пат податоците за состојбата на човековите права во Северна Македонија.
ИЗБОРИ Претставничката на Европски фронт, Арта Билали Зендели, вчера на прес конференција најави дека дека и ветингот на носители на политички функции и носители на големи одговорности во сферата на судството и борбата против криминалот и корупцијата, ќе биде услов за новата Влада.
ПРОПАГАНДА
„Колку и да се трудат некои релативизатори во тврдењето дека во Северна Македонија нема руско влијание и пропаганда, реалноста секојдневно го потврдува токму спротивното. И додека погледите најчесто се свртени кон одредени политичките ентитети и медиумите како најревносни во ширењето на руската пропаганда, истата се спроведува на едно многу помалигно ниво, и ги таргетира децата во нивната најрана возраст“, се вели во извештајот на Мониторинг тимот на ЦИВИЛ „Се започнува од детството“ – кумановска професорка шири руска пропаганда кај своите малолетни ученици“
ЦИВИЛНИ АКТИВНОСТИ
ЦИВИЛ во континуитет ги алармира јавноста, институциите, политичките партии и медиумите за злоупотреба на децата за политички цели и бара од институциите да ги санкционираат сите што ги вовлекуваат децата во политиката на било кој начин. Мониторинг тимот на ЦИВИЛ констатира голем број случаи на злоупотреба на деца и малолетници, како во изборен контекст, така и за ширење етничка и верска омраза, но и за ширење на руска злонамерна пропаганда.
ИЗБОРНА ХРОНИКА
„Кампањите за претседателските и парламентарни избори неделава се најдоа во работна недела со два неработни дена, но, со уште по зајакнат интензитет, остри реторики, препукувања, националистички наративи и „трки“ за простор и време“, прочитајте повеќе во „ИЗБОРНА ХРОНИКА: ЦИВИЛ бара заштита на децата од политичка злоупотреба; „Бугарски воз“ во Липково кај управен суд; ветинг, амнестии и проблематичен цензус“.
СЛОБОДНА ЗОНА
„Кампањата со омраза, навреди и лаги против мене продолжува. Интересно е да се забележи дека секогаш кога организацијата што ја претставувам излегува со супер видливи и влијателни содржини и пораки, таа кампања се засилува. Така, иницијативата за промоција на правото на глас, извештаите од изборниот мониторинг, анализите на руските хибридни тактики и пораките за ставање крај на етнички мотивираната омраза и насилство, како и редовното известување за руската агресија против Украина и демократскиот свет – секогаш добиваат „амин за јуриш““, пишува Џабир Дерала во „Каде е Џабир Дерала?“.
„Во многуте сличности меѓу бугарската и нашата политичка сцена, не секогаш зависна од меѓусебните спорови и спорења, секако влегува и тој битен пејзаж – медиумскиот. Кај окупацијата на ТВ станиците и весниците, која е стара практика уште од „првото вмро“, не без традиција и во претходниот период, секако, посебно дојде до израз во времето на владеењето на камарилата на Груевски, познат по тоа дека и кај оние уредници и сопственици со слугански табиет, а кои во разговор со него инсистирале, на малку „неутралност во пристапот“ отсечно одговарал – или си со нас или си против нас. Трето нема“, пишува Љубомир Костовски во анализата „Историскиот ревизионизам на македонските и бугарските медиуми“.
Подготви: Б. Јордановска
