„Деновиве во јавноста се почесто се зборува за процес на инклузија на децата со попреченост. Тоа во превод би значело вклучување на децата со попреченост во основни и средни училишта за лица со нормален невропсихички развој. Како студент на Институтот за дефектологија при УКИМ во изминатиов семестар, при посета на основните и средните посеби училишта имав можност да видам успешни и не толку успешни инклузивни методи. Сум видела деца на кои одлично им влијае овој процес, но и деца на кои инклузијата не оставила позитивна трага поради нивната релативно лоша прогноза, или пак поради нестручноста на персоналот во училиштата…“ пишува за ЦИВИЛ Медиа, Софија Стојановска.
Стојановска потсетува дека процесот на инклузија започнат уште во 2000 година и создавањето на првите дневни центри во 2002 е процес кој се уште трае, но со многу недостатоци и недоследности.
Еден таков пример е дневниот центар во с. Манастирец којшто се отвора по барање на корисниците, а кој нема стручен персонал. Дневниот центар нема логопед, дефектолог и физиотерапевт.
„Дневниот центар од Манастирец е отворен онолку колку што бараат корисниците од Манастирец, нема обезбедено ниту еден оброк, нема служба за поддршка на семејствата и не ја реализира програмата утврдена од Заводот за социјални дејности. Центрите за социјална работа кои се надлежни за децата сместени во згрижувачки семејства ги посетуцаат семејствата повремено (еднаш годишно) или многу ретко (еднаш на четири до пет години)“, пишува Стојановска.
ЦИВИЛ Медиа за состојбата со дневниот центар во с. Манастирец побара одговор и од Министерството за труд и социјална политика. Тие ниту негираат, ниту ги потврдуваат овие информации.
„Дневниот центар во Манастирец го посетуваат десет корисници сместени во згрижувачки семејства во с. Манастирец, со кои работи едно лице – неговател и под надозр на стручните лица од Центарот за социјална работа – Македонски Брод. Сите семејства од с. Манастирец имаат добиено соодветна обука за згрижувач од страна на СОС Детско село“, велат од МТСП.
Оттаму велат дека со лицата сместени во згрижувачките семејства работат стручни тимови од центрите за социјална работа од каде доаѓаат корисниците, но не одговорија колку се чести „редовние посети кои ги вршат стручните работници од ЦСР Македонски Брод.
Од Министерството велат дека во наредниот период е планирано зајакнување на стручната поддршка на згрижувачките семејства со обезбедување на обуки и посета во самите семејства.
