ВМРО-ДПМНЕ е против сите стратешки одлуки кои што земјата ги има донесено од своето осамостојување до денес, вели во интервју за националната телевизија МТВ претседателот на СДСМ и премиер на Република Северна Македонија, Димитар Ковачевски.
ВМРО-ДПМНЕ е против сите стратешки одлуки кои што земјата ги има донесено од своето осамостојување до денес. Значи ако се навратиме на зачленувањето во НАТО, Преспанскиот договор, ако се навратиме на склучувањето на Договорот за добрососедство, на преговарачката рамка, секогаш ВМРО-ДПМНЕ е против. Меѓутоа не гласаа против, тие секогаш ја напуштаат Собраниската сала. А потоа се затскриваат зад граѓаните со барање на одредени иницијативи, референдуми итн., истакна Ковачевски.
Тој додаде дека „дури 17 години чекавме почеток на преговори со ЕУ, а цели 11 години ВМРО-ДПМНЕ беше власт“.
Ако се навратиме назад ние ќе видиме дека 17 години сме чекале за отпочнување на преговорите со ЕУ. Меѓутоа во тие 17 години, 11 години на власт беше ВМРО-ДПМНЕ. Проблемот е што ВМРО-ДПМНЕ и политиката која што ја водеше тоа раководство, а која што политика е пресликана во ова раководство. Јас не повлекувам знак на еднаквост меѓу раководство на политичка партија и целото членство. Тоа е политика на дисконтинуитет на државата. Значи вие ако ја погледнете политиката која што ја водел претседателот Глигоров, која што ја водел премиерот Кљусев, која што ја водел претседателот Црвенковски, премиерот Георгиевски, претседателот Трајковски и ако ја споредите со политиката на 11-те години на Груевски и на Иванов, тогаш ќе видите јасна разлика, потенцира Ковачевски.
Премиерот Ковачевски во интервјуто јасно посочува на политиките на интеграција и добрососедски односи и носењето на лидерски одлуки од една страна и деструктивните 11 годишни политики на ВМРО-ДПМНЕ и правење се да не се случи членство во НАТО и ЕУ.
Првите беа политики на интеграција, политики на добрососедски односи, политики на напредување на Северна Македонија, односно на Република Македонија во тоа време, во евроатланските интеграции и во НАТО интеграциите. Политиката од 11 години на ВМРО-ДПМНЕ беше декларативно за зачленување во НАТО и ЕУ и правење се тоа да не се случи, наведува премиерот и претседател на СДСМ, Димитар Ковачевски во интервју за националната телевизија.
Според него, „проблемот на ВМРО-ДПМНЕ е што политиката на поранешното раководство е пресликана во политиката на актуелното раководство и нема никаква промена во оваа партија“.
Нема никаква разлика, затоа што ова раководство на ВМРО-ДПМНЕ е само наследство на претходното раководство. Тоа се советниците во кабинетот на поранешниот претседател или претседател на Влада. Исто декларативно се за НАТО и ЕУ, а од друга страна прават се да ги нарушат и внатрешните односи во државата, односно етничките, што можевме да го видиме на протестите при гласањето на Европскиот предлог за отпочнување на преговорите со ЕУ. Исто така е и денес. Прво преку поставувањето на антиуставно прашање за референдум. И второ поддршка на една политичка партија Левица која што има отворена соработка со политички партии од Руската Федерација и која што отворено се залага против членство во НАТО и во ЕУ, вели македонскиот премиер и претседател на СДСМ, Димитар Ковачевски.
Во интервјуто за МТВ Ковачевски ги повикува пратениците во македонското Собрание да делуваат одговорно и врз основа на мандатот кој им е доверен од граѓаните да носат одлуки кои ќе значат напредок на земјата.
Пратениците го претставуваат народот, тие не претставуваат политичко лидерство бидејќи народот им дава мандат на пратениците во Собранието, и затоа имаат обврска пред своите гласачи да носат одлуки кои што ќе значат просперитет на државата, рече претседателот на СДСМ, Димитар Ковачевски.
