пишува: Сашо Орданоски
[dropcap]П[/dropcap]арадоксално, во однос на убедливоста на резултатите на тукушто завршените локални избори, но впечаток е дека речиси никој не е задоволен од досегашната работа на новата влада, во речиси ниту една област. Со исклучок на потезите кон соседите (иако и во надворешната политика не е јасно дали има доволна синхронизација меѓу три-четворицата главни „тркачи“), другото е килаво, без душа, без поголеми промени, без особено нови или свежи идеи, главно „санациски“, како чистење подрум кога ќе ти избие канализација… До сега, добивме влада на континуитет од оние влади на Груевски, само малку полошо, бидејќи демократскиот капацитет и правните стандарди во оваа влада се многу повисоки (за сега) од оние на Фамилијата, па процесите се поспори, покомпликувани, понеефикасни…
И, секако, овој премиер е многу посимпатичен од претходниот. Сѐ уште.
Предложениот буџет – од она што го слушам и од луѓе кои многу повеќе се разбираат од мене во тие работи – не навестува никакви позначајни општествени или политички промени. Како да го правеле сметководители, а не луѓе со амбиција да го менуваат светот. Мочуриштето е исто, гумените чизми за газење во него се понови. Ниту едно министерство не планира и не предлага ништо ново, ниту еден министер не се истакнал со некоја поконтроверзна или похрабра замисла којашто би пробила некоја нова авенија на размислување.
А и не знаат да лажат така – големо, арогантно, гламурозно, „од високо“ – како што лажеше ВМРО. На пример: „Компјутер за секое дете!“ (Ба-бааам!)… „Сто милиони земјоделски субвенции!“ (Траааас!)… „Кај Охрид ќе направиме Силиконска Долина!“ (Бууум!)… „Ќе отвориме индустриски зони во секое село!“ (Бупетее!)… „Машински факултет во Виница!“ (Тадааа!)… „Скопје 2014“ да не го ни спомнувам.
Важно, на делови од администрацијата ќе им се зголемат платите, на наша сметка. И нема никој да биде отпуштен, бидејќи ги штител законот, а и за да не се навредат. Ако на тоа се додаде менаџирањето на „нормалните“ гафови во едно владеење, тогаш не е чудно што, на пример, една обична, трагична мафијашка пресметка (колку што слушам, пиштоли се носеле на двете страни), во јавноста ја вади целата Влада од колосек.
Сега разбирам дека и БЕСА размислува да влезе во Владата, плус соработката со пратениците на „вечниот Тачи“ во Собранието. А и Амди Бајрам, наводно, преговарал да му се приклучи на ДУИ. Можеби е време, откако го кооптиравме Сител во промените, и со Груевски да се преговара за поддршка на новата Влада? На крај, како што се одвиваат работиве, само Зијадин Села ли ќе се отцепи во опозиција!?
Мојот впечаток е дека Владата на Заев е премногу импресионирана од предизвиците што ги остави катастрофата по Груевски. А можеби и ние премногу ги подигнавме очекувањата од екипата на власт која има поскромни капацитети од она што го замислуваме дека е неопходно за да се извлечеме од депресијата во која се наоѓа земјата?
Преземањето на оваа содржина е дозволено само по 11 часот, на денот на објавувањето. Потоа, важат вообичаените правила според лиценцата Creative Commons 1.0.
