Неколку илјади жители од ромската населба „Тризла“ во Прилеп, живеат во исклучително тешки услови. „Тризла“ е населба на дивоградби, за коишто доправа треба да се изработува Детален урбанистички план и овој дел од градот за да се инкорпорира во водоводната и канализационата мрежа, како и да се гради соодветна патна инфраструктура.
Но, исклучително тешки се условите за живот на граѓаните од маалата „Три багреми“, „Мексико“ и „Дебарца“. Овде има семејства коишто наместо во куќи и станови, живеат во картонски бараки, а наместо прозори имаат дебели најлони. За улично осветлување не станува збор, зашто на места нема ни улици, луѓето живеат на карпи. А, електрификацијата каква-таква, низ маалото е слаба. Во невреме дел од жителите страдаат од громови. Вода пијат од вештачкото езеро. Отпадоци има на сите страни, бидејќи немаат канти за отпадоци, ниту пари да купат. За канализација не станува збор.
Во 21 век, децата од оваа населба за да стигнат до училиште треба да пешачат и во дождливи денови, како во најморничав сон, во кал до коленици. Многу од нив немаат ниту соодветна топла облека или чизми во зима. Потресна и претешка е животната приказна на секое семејство.
И тука, политичарите доаѓаат со години. Локалната власт на ВМРО-ДПМНЕ, на чело со досегашниот градоначалник, Марјан Ристески, 12 години им ветуваа дека ќе најдат соодветно станбено решение, за да бидат сместени во тврди градби. Им ветуваа вода, струја, канализација… Но, од ветувањата во оваа населба не е ништо направено.
Единствено во целата населба, со одлука на Советот на Општината, со пари од сите граѓани на Прилеп, се финансираше дел од изградбата на џамијата, лоцирана на почетокот на населбата „Тризла“.
Асфалтирана е и една улица што води низ населбата, но другите проблеми на жителите не се решени. Тие пак не кријат, дека на досегашните избори, доаѓаале претставниците на политичките партии, им носеле брашно, шеќер, масло и така ги „купувале“ гласовите.
„Па, земаме сѐ што ќе ни дадат, зашто ние сме најсиромашни граѓани. Најголем дел од нас се корисници на социјална помош. Но, меѓу нас има граѓани, коишто немаат ни лични карти, зашто овде нема улици“, реагираат жители од населбата.
Тие се револтирани и при посетите на новинарски екипи. Велат дека веќе никому не веруваат, зашто секогаш се искористени од политичарите само за да добијат гласови,а потоа никој не им ги решава проблемите.
При посетата на Прилеп, во петокот, кога ВМРО-ДПМНЕ го одржа митингот, лидерот Никола Груевски одлучи својот „спас“ да го побара и со гласовите на овие граѓани. На митингот во „Тризла“, Груевски како што јави набљудувачот на ЦИВИЛ, се поздравувал со дел од овие граѓани, верувајќи дека ќе ги убеди, повторно да му ја дадат довербата.
На 11 октомври, во Прилеп, митинг ќе одржи и СДСМ. Жителите велат дека го очекуваат и Зоран Заев да ги посети. „Ќе ги пречекаме политичарите, нека дојдат. Ќе ги чуеме, ама веќе нема да ги ‘продаваме’ своите гласови за брашно и шеќер. Овој пат, ќе размислиме добро, дали воопшто ќе се појавиме на гласање. А, ако одлучиме да гласаме, тогаш тоа ќе биде за кандидатот за градоначалник кому ќе му веруваме, дека сепак нешто ќе направи, за да го подобри нашиот живот во ‘Тризла’“, изјавија граѓани на оваа населба за ЦИВИЛ Медиа.
Набљудувач на ЦИВИЛ, известува дека наводно ромска невладина организација, деновиве во Прилеп, спроведувала анкета, „Кој ќе биде новиот градоначалник?“, барајќи од граѓаните да кажат за кого од двајцата кандидати ќе го дадат својот глас: за актуелниот Марјан Ристески од ВМРО-ДПМНЕ, којшто бара четврт мандат, или за Илија Јованоски од СДСМ, којшто прв пат се кандидира за оваа функција.
Моника Талеска
